Жергілікті полиция қызметі басқармасы әйелдерді зорлық-зомбылықтан қорғау тобының ерекше тапсырмалар жөніндегі аға инспекторы, полиция майоры Райса Зинелғабиденқызының айтуынша, елімізде отбасы институтының беделін арттыру, нығайту мақсатында жүйелі жұмыстар атқарылып келеді. Отбасындағы жанжалдан басталып, зорлық-зомбылыққа ұласатын әрекеттерден зәбір көретіндердің басым бөлігі – әйелдер мен балалар. Сол себептен, оларға да, зәбір көрсетушілерге де психологиялық кеңес қажет.
«Аптасына үш рет әкімшілік қамауда отырған азаматтар психолог-маманмен жеке кездесіп, сұрақ қоя алады. Топтық сеансқа қарағанда, жеке кеңестің тиімдірек екені байқалып отыр. Себебі психологке жүгінушілерге арнайы сұрақтарға өзге адамдар алдында ашылу қиынға соғады. Психолог кабинетіне көп жағдайда ер адамдар келеді. Үстінен арыз жазылып, бірнеше күн камерада отырғандармен, уақытша қамаудағылармен әңгімелесу өте қиын. Олар ашылып сөйлеспейді. Тіпті барлық мәселеге бәрібір деген көзқарасы басым. Мәселен, қабылдауға келген бір адам әйелімен араздасып қалғанын, енді үйіне бармау үшін уақытын осындай орында өткізгенін қалаған. Отбасылық құндылықтар тақырыбында өткізілген топтық сеанстан кейін ол бірнеше жыл ішімдікке салынғанына, отбасын бағаламағанына өкінді», дейді психолог Ақмарал Шәріпова.
Әйелдерді зорлық-зомбылықтан қорғау тобының ерекше тапсырмалар жөніндегі аға инспекторы, полиция майоры Райса Зинелғабиденқызының дерегіне сүйенсек, тұрмыстық зорлық-зомбылық үшін кінәлі адамдар Әкімшілік құқық бұзушылық туралы кодексінің 73-бабымен жауапкершілікке тартылуы мүмкін. Егер олардың әрекетінде қылмыстық құқық бұзушылық құрамы болса, Қылмыстық кодексінің 106-бабымен (Денсаулыққа қасақана ауыр зиян келтіру), 107-бабымен (Денсаулыққа ауырлығы орташа зиян келтіру), 110-бабымен (Қинау), 115-бабымен (Қорқыту) қылмыстық жауапкершілікке тартылады.
«Қазір Атырау облыстық полиция департаментінде әйелдер мен балаларды тұрмыстық зорлық-зомбылықтан қорғау мақсатында 10 аға учаскелік инспектор жұмыс істейді. Олар «Тұрмыстық зорлық-зомбылықтың құқықтық негіздері және оның алдын алу мәселелері» тақырыбында семинар-тренинг өткізеді. Мақсатымыз – зорлық-зомбылықтың, отбасылық жанжалдың алдын алу», дейді Райса Зинелғабиденқызы.
Атырау облысы әкімі аппараты жанындағы әйелдер істері және отбасылық-демографиялық саясат жөніндегі комиссия хатшысы Зәмзәгүл Жалмурзинаның айтуынша, мұнайлы шаһарда 2012 жылы дағдарыс орталығы ашылған. Мұндай орталықтар Жылыой және Құрманғазы ауданында бар. Енді Исатай ауданында отбасын қолдау және дағдарыс орталығын ашу көзделген.
«Қиындыққа ұшыраған әйелдер мен олардың балаларына психологиялық, құқықтық, медициналық көмек көрсетіледі. Жыл басынан орталыққа 24 әйел мен 63 бала түсті. Қазір олардың саны азайып, 5 ана мен 16 балаға көмек көрсетіліп отыр», деп мәлім етті тұрмыстық зорлық-зомбылыққа ұшыраған әйелдерге көмек көрсету бөлімшесі директорының орынбасары Айбаршын Иманғалиева.
Жергілікті полиция қызметі әйелдерді зорлық-зомбылықтан қорғау тобының инспекторы, полиция аға лейтенанты Әйгерім Орақбаеваның мәліметінше, зәбір көргендерден күніне 20-25 хабар түседі. Мәселен, биыл алты айда тұрмыстық зорлық-зомбылыққа қатысты 102 арнасына 4 097 хабар түскен. Осындай дерекке байланысты Әкімшілік құқық бұзу туралы кодексінің 73-бабымен (Отбасы-тұрмыстық қатынастар аясындағы құқыққа қарсы әрекеттер) 1 198 адам жауапкершілікке тартылған. Ал 1 365 құқық бұзушыға қорғау нұсқамасы шығарылыпты. Оның ішінде 334 адамға ерекше талап қойылған. Қорғау нұсқамасын бұзған 96 адамға Әкімшілік құқық бұзушылық туралы кодексінің 461-бабымен әкімшілік жаза берілген.
Атырау облысы
