Мемлекетте әр кез болып тұратын оқыс оқиғалар, апатты жағдайлар төтеншелік департаментінің кезекші пультін бір сәт те тыныш қоймаған. Құтқарушылар жылдың қай мезгілінде де өз міндетіне қалтқысыз адал. Қыстың күндері аяз бен қардан жапа шеккен тұрғындарға бірінші болып көмекке ұмтылады. Қала берді ыстан уланып қалмаудың қам-қарекетімен де уайым-қайғы жейді. Көктемде жауын-шашыннан кейінгі сел болған аумақтарда резіңке етікпен су кешіп жүреді. Жазда өзен-тоғандарды күзетіп, балалардың суға батып кетпеуін қадағалайды. Адамдарды әртүрлі табиғи, техногендік апаттардан дереу құтқарып, ажалдан арашалап аман алып қалатын төтеншеліктердің күнделікті жұмысы – міне, осындай.
Шымкент қаласы төтенше жағдай департаментінің «101» диспетчерлік пультіне 10 қазан сағат 16.02 шамасында Абай ауданы Төлеметов көшесіндегі көпқабатты тұрғын үйде өрт шыққаны туралы хабарлама келіп түседі. Өрт болған жерге тез арада 7 өрт сөндіру техникасы, жеке құрамнан 37 адам жіберіледі. Оқиға былай болған: тұрғын үйдің бір пәтерінің балконындағы үй заттары жанып кеткен. Содан алапат өрт орын алып, үйдің іші қара түтіннен көрінбей қалған. Бірақ өрт сөндірушілер қызыл жалынның одан әрі таралуына жол бермей, сағат 16.20-да «тілсіз жауды» оқшауласа, 16.24-те толығымен сөндірген. Осы арада №5 өрт сөндіру бөлімінің аға өрт сөндірушілері Марат Әліпбаев пен Арман Махмұт қою түтінге қойып беріп пәтердің ішіннен 4-5 жасар екі балдырғанды іздеп тауып, тез арада қауіпсіз жерге шығарған. Оқиға орнына тез жеткен жедел жәрдем бригадасы сол жерде балаларға алғашқы медициналық көмек көрсеткен. Алдын ала болжам бойынша балалар от жағып ойнап, ақыры өрттің шығып кетуіне себепші болған.
Шымкенттік өрт сөндірушілер оның алдында да тағы бір адамның өмірін құтқарып қалған еді. Бұл оқиға 2023 жылғы 28 қыркүйекте сағат сол 22.30 шамасында болды. №2 өрт сөндіру бөліміне қыз бала жүгіріп келеді. Өңі құп-қу қыз әкесінің қараусыз қалған ғимараттың 5-қабатынан секіргелі жатқанын хабарлап, өрт сөндірушілерден көмек сұраған. Қарауыл бастығы Марлен Сейілбек өрт сөндіруші Уалихан Жүсіппен бірге тез арада оқиға орнына барып, 5-қабаттан секіріп, өзіне қол жұмсамақ болған 1980 жылғы азаматты құтқарып қалды. Бөлім қызметкерлері өзіне қол жұмсамақ болған азаматпен жылы әңгімелесіп, сабасына түсіріп, райынан қайтарған. Сөйтіп, психологиялық еркін сұхбаттың арқасында ол әрекетінің қате екенін түсініп, отбасына аман-есен оралады.
Құтқарушылардың ерлігін насихаттау мақсатында елімізде көптеген іс-шара атқарылып жатыр. Соның бірі бүгінде Астана қаласында өтіп жатқан Rizamyz Qutqarushi фотокөрмесі дер едік. Фотокөрме барысында елорданың «Атырау» жаяу жүргіншілер көпіріне ТЖМ қызметкерлерінің 112 портреті қойылды. Олар барлығы осы саладағы өрт сөндірушілер, құтқарушылар, сүңгуірлер, кинологтер, медицина қызметкерлері, ұшқыштар, психологтер, әскери қызметшілер. Фотосуреттер ішінде Шымкент қаласы төтенше жағдайлар департаментінің 7 қызметкері бар. Әрбір портретте QR-код бейнеленген. Оны сканерлеу арқылы Нұрбек Тәукеевтің, Роман Письменскийдің, Асхат Қалыбаевтың, Шухрат Халметовтің, Әділет Жорабектің, Дәулет Шаменовтың, Үсен Рахматуллаевтың өміріндегі жарқын оқиғаларын білуге болады. Сонымен бірге rizamyz.com сайтында қызметтік міндеттерін орындау кезінде ерлікпен қаза тапқан 11 құтқарушының ерліктері туралы баяндалады. Осынау батырлардың арасында 2014 жылы «Plant»» ЖШС фармацевтикалық заттарды сақтау қоймасында өрт сөндіру кезінде қаза тапқан Жұлдызбек Есеналиевтің есімі ерекше құрметпен аталады.
ШЫМКЕНТ
