М.Өтемісұлы атындағы академиялық қазақ драма театрында өткен жиында облыс әкімі Серік Шәпкенов өңір жұртшылығын Республика күнімен құттықтап, әр саланың үздіктеріне награда тапсырды.
«Бұл тарихи құжат ел Конституциясы мен заңдарының үстемдігін айқындап берді. Біз жас буынға ел тарихындағы осындай айтулы күндердің бағасы мен мәнін ұғындырумыз керек. Қоғамда шынайы демократияландыру үдерісі жүріп жатқанын азаматтардың еркі мен бостандығының қамтамасыз етілуінен, азаматтық қоғам құра алғанымыздан анық аңғаруға болады», деді Серік Шәпкенов.
Президент Жарлығымен мемлекеттік награда алып, мерейі өскендердің арасында еңбек ардагерлері мен әр салада еңбек ететін жандар бар. Олар – мұнайлы өңірдің дәулетін тасытып, сәулетін асырып жүрген мемлекеттік қызметшілер, мұнайшылар, спортшылар мен мұғалімдер, медицина қызметкерлері, ауыл шаруашылығы, мәдениет пен өнер, энергетика саласының, БАҚ өкілдері. Мәселен, «Парасат» орденімен еңбек ардагері Мәдина Ғабдісәлімова марапатталды. Ол партия жұмысында шыңдалып, кейін 1982-1991 жылдары облыстық кәсіподақтар кеңесіне жетекшілік еткен. Қарапайым еңбек адамының мүддесін қорғады. Тәрбиелік, тәлімдік маңызы зор түрлі комиссияны, қоғамдық ұйымдарды, бейбітшілікті қорғау қорын, облыстық әйелдер кеңесін басқарды. Облыс әкімі жанындағы отбасы және демографиялық саясат комиссиясының кеңесшісі ретінде әйелдердің әлеуметтік, тұрмыстық проблемаларын шешуге үлесін қосып келеді.
Әр салада ізденісімен, іскерлігімен танылған 9 адам «Құрмет» орденімен марапатталды. Мәселен, Халел Жамалов алғашқы еңбек жолын Құлсары автокөлік кәсіпорнының электригі ретінде бастаған. Кейін Оңтүстік Ембі мұнай барлау экспедициясында V санатты машинист, бұрғылау шеберінің көмекшісі, инженерлік-техникалық қызметтің механигі болған. Соңғы жылдары Жылыой ауданының әкімі лауазымына тағайындалған еді. Қазір «Горизонт» ЖШС бас менеджері қызметін атқарып жүр.
Жергілікті спортшылар арасында Анатолий Лысяк жаттықтырушы ретінде танымал. Бұқаралық спортты дамытуға үлес қосып жүрген ол Атырау қаласындағы Қ.Сәтбаев атындағы №19 мектеп-гимназиясында денешынықтыру пәнінен дәріс береді. Бұған қоса, «Атырау барыстары» баскетбол академиясында жас өрендерді спортқа баулып жүр. Оның шәкірттері облыстық, республикалық, халықаралық додаларда жүлдегер атанған.
Сондай-ақ 3 жерлесіміз ІІІ дәрежелі «Еңбек даңқы» орденінің, 2 майталман «Шапағат» медалінің иегері атанды. «Ерен еңбегі үшін» медалі 19 адамға берілді. Олардың арасында 40 жылдан бері БАҚ саласында еңбек етіп жүрген танымал қаламгер, «Атырау-Ақпарат» ЖШС бас директорының орынбасары Исатай Балмағамбетов те бар. Еңбек жолын 1983 жылы қазіргі облыстық «Атырау» газетінде бастаған. Кейін «Жас Алаш» басылымының батыс өңірдегі меншікті тілшісі ретінде шыңдалған. Қаламы қарымды журналист республикалық «Алтын орда» газетінің, содан соң 10 жыл облыстық «Атырау» газетінің бас редакторы болды.
Дәл осындай медальмен марапатталған «Былина» газетінің тілшісі Лев Гузиков та өңір шежіресінің түзілуіне үлес қосып жүрген жан. Ал Исатай ауданындағы Ж.Мырзағалиев атындағы орта мектептің мұғалімі Тәбила Исмағұлова оқушыларды математика пәнінің қыр-сырына баулиды. Отыз бес жылдан бері ұстаздық етуден жалықпаған педагог білім ордасының директоры да, басшының орынбасары да болып, өз тәжірибесін әріптестерімен үнемі бөлісіп келеді.
Бұл күні М.Өтемісұлы атындағы академиялық қазақ драма театрының әртісі Ғазиза Бисенова Қазақстанның еңбек сіңірген қайраткері атанды. Бір топ атыраулыққа Қазақстан Республикасының Құрмет грамотасы берілді.
Атырау облысы
