Мемлекет қауіпсіздігі мен ел тұрғындарының өміріне қауіп төндіретін қылмыстарға қарсы жедел әрекет ететін «Бүркіт» арнайы жасағы туралы жарыққа шыққан жаңа туынды – осы бос кеңістікті толтыруға бағытталған отандық кинематографиядағы үшінші фильм. Мәдениет және ақпарат министрлігінің тапсырысымен, Ұлттық киноны қолдау мемлекеттік орталығының қаржыландыруымен түсірілген кинокартина болған оқиғалардың негізінде жанкешті жасақтың қат-қабат, қауырт жұмысын боямасыз баяндайды.
Ұлттық киноны қолдау мемлекеттік орталығы басқарма төрағасы Құрманбек Жұмағалидың айтуынша, бүгінгі көрерменнің талғамы биік, сұранысы жан-жақты. Сондықтан, көрерменге әртүрлі жанрдағы, осындай түрлі трюкқа толы экшн фильмдерді де ұсынған жөн. Фильмде «Бүркіт» арнайы жасағының сарбаздары «күрең берет» кию құқығына ие болу үшін сынға түседі.
«Елімізде 200-ге жуық «күрең берет» иегері бар екен. Күрең берет кию мәртебесіне арналған біліктілік сынағынан өту – жауынгерлік рухтың белгісі. Сондықтан, жаңа фильміміз жастарды Отанға деген адалдық пен риясыз махаббатқа тәрбиелейді деп сенеміз», деді Құрманбек Жұмағали.
Фильмнің режиссері – Данияр Ибрагимов, бұл картина оның дебюттік жұмысы. Бұған дейін Данияр «Қазбат» және «Алтыншы бекет» әскери фильмдерінің продюсері болып, тың тақырыпта елеулі тәжірибе жинақтаған.
Фильмге Дәурен Серғазин, Санжар Мәди, Асылхан Төлепов, Гүлнәз Жоланова, Әсел Сағатова, Жандос Айбасов және Азамат Сатыбалды сынды еліміздің танымал актерлері түсті. Сонымен бірге қазақ музыкасына жаңа стиль сыйлаған белгілі эстрада әншісі Ғалымжан Молданазардың да антагонист кейіпкердің рөлінде көрінуі фильм шынайылығын арттыра түскен. Басты рөлдегі актерлер түсірілім жұмыстарына кіріспес бұрын бірнеше апта бойы жауынгерлік оқу-жаттығуларына қатысып, әскери әрекеттің әдіс-тәсілдерін үйренген.
«Фильмге түсу үшін біз арнайы нормативтерді тапсырдық. Шынайы сарбаздардан айырмашылығымыз болмауы үшін олардың күнделікті тыныс-тіршілігімен жете таныстық. Түсірілім аяқталғанша 30 килодан ауыр форманы киіп жүрдік. Бір эпизодтың түсірілімі кезінде арқамды оңбай жарақаттап алдым. Бір апта бойы ем алуыма тура келді. Каскадер жасайтын барлық трюкті өзім орындауға тырыстым», дейді бас кейіпкерлердің бірі Санжар Мәди.
«Burkit» фильмінің түсіріліміне арнайы жасақ, әскери техника және авиация, сондай-ақ екі жүзден астам белсенді әскери қызметші қатысқан. Жедел-іздестіру шараларына арқау болған картинаның түсірілімі Алматы облысының көрікті жерлерінде, Қонаев қаласында, Есік көлінің тау сілемдерінде және Іле өзенінің бойында өткен.
«Burkit» экшн фильмі 2 қарашадан бастап барлық кинотеатрда қазақ және орыс тілдерінде көрсетіледі.
АЛМАТЫ
