Жақып Асанов өз сөзінде Мемлекет басшысының елорданы дамыту мәселелері жөніндегі кеңесте Астананы көгалдандыру ісінде мәселелер бар екенін айта келіп, жұмыс әдістерін өзгерту қажеттігіне тоқталғанын еске салды.
«Бұл мәселені зерделегенде бірнеше ауқымды мәселе байқалды. Олардың ішінде екі негізгі әрі ең өзекті мәселені ерекше атап өтуге болады. Біріншісі – су тапшылығы. Мамандардың пікірінше, оны шешудің ең тиімді және ұтымды әдісі – құбыр суын пайдалану. Құбырдағы суда тек табиғи су ғана емес, сонымен қатар ағын су да бар. Оны қайта өңдеуге және барынша пайдалануға болады. Ағаш отырғызу жұмыстары бәсекелес ортаға берілді. Мемлекеттік сатып алуда кім жеңіске жетсе, сол ағаш отырғызады. Мұндағы ең маңызды өлшем – баға. Конкурстарда жеңіске жеткен компаниялар арзанға сатып алынған көшеттерді отырғызып, кетіп қалады. Олар ағаштың болашағына алаңдамайды. Бұл мәселе де маңызды», деді Жақып Асанов
Экология және табиғи ресурстар министрлігінің өкілдері сенаторларға жасыл елорданың жай-күйі және осы ерекше жобаны одан әрі дамыту жоспары туралы айтып берді. Ал Астана қаласы әкімдігінің басшылығы қаланы көгалдандыру саласының өзекті мәселелері және оларды шешу жолдарымен бөлісті.
Кездесуге Парламент Сенатының депутаттары, экология және табиғи ресурстар министрі Ерлан Нысанбаев, Астана қаласының әкімі Жеңіс Қасымбек, мүдделі мемлекеттік органдардың өкілдері және Астана қаласы мәслихатының депутаттары қатысты.
Депутаттар кездесу қорытындысы бойынша ұсынымдар әзірленіп, алдағы уақытта үкіметке жіберілетінін атап өтті.
