Бұл ақпаратты Қазақстан ұлттық құрамасының бас бапкері Магомед Адиевтің өз аузынан естідік. Екеуінің де ауыр жарақаты бар. 22 қазанда Шымкентте өткен Премьер-лиганың 25-турында Қарағандының «Шахтеріне» қарсы кездесуде «Ордабасының» жартылай қорғаушысы Асхат Тағыберген ауыр жарақат алып, ойынды жалғастыра алмады. Ал өткен аптада Түркия чемпионатының 12-турында «Истанбұл Башакшехирдің» ойыншысы «Бешикташтың» сапында өнер көрсетіп жүрген Бахтиер Зайнутдиновті шынтақпен ұрып жіберді. Жерлесіміздің беті қанға боялып, 41-минутта бас бапкер оны өзге футболшымен алмастырады. Кейін белгілі болғандай, Бахтиердің мұрын сүйегі сынып, көзіне де қатты зақым келген екен. Соның салдарынан еліміздің қос мықты аяқдоп шеберлері алдағы маңызды матчтарға қатыса алмайтын болды.
