Мейірімнің мерейі үстем

Сойқан соққылы саңлақ­тардың өнерін тамашалау үшін жанкүйерлер «Хумо Аре­наға» көптеп жиналды. Жа­рыстың басты жекпе-жегінде ара-тұра кәсіпқой рингте күш сынасып жүрген әуесқой бокстың шоқ жұлдызы Баходир Жалолов пен Оңтүстік Африка Республикасының (ОАР) мық­тысы Крис Томпсон жұды­рықтасты. 29 жастағы Өзбекстан мақтанышының Олимпия (2021) мен Азия ойындарының (2022) жеңімпазы, әлемнің екі (2019, 2023) және Азияның үш (2017, 2019, 2021) дүркін чемпионы деген атақтары бар. Баходир Жа­лоловтың біздің Қамшыбек Қоң­қабаевты үнемі қапы қал­дырып жүргенін жұрт жақсы біледі. Кәсіпқойлар арасында Баходир 13 кездесу өткізіп, барлығында айқын басымдық танытты. Әзірге бірде-бір боксшы оның қарқынына шыдамады. 28 жастағы Томпсон кәсіпқой рингте 2007 жылдан бері бақ сынап келеді. Алты жыл аралығында 18 мәрте шаршы алаңға көте­рілген ол 12 рет жеңіске жетіп, 5 рет ұтылды. Тағы бір тартыс­та тең есеп тіркелді. Крис жеті қарсыласын есінен тандыр­ды. Бірақ бұл бәсекенің бастал­ғанынан аяқталғаны тез болды. Баходир бірінші раундта-ақ ОАР өкілін ауыр соққысымен сұлатып салды.

Жарыстың басты бәсе­ке­ле­рінің бірінде қазақтың ұлы Мейірім Нұрсұлтанов ит арқасы қияндағы сонау Чилиден келген Хулио Аламоспен айқасты. 30 жастағы қандасымыз 20 жекпе-жектің бірде-біреуінде ұтылған емес. 11 қарсыласын ол нокаутқа жіберді. 32 жастағы Сантьягоның тумасы алғашқы 16 кездесуін жеңіспен аяқтап, тоғыз бәсекелесін айқын жеңді. Соңғы рет биыл жазда италиялық Эти­нос Олихаға ұпай санымен есе жіберді. Соның салдарынан чилилік спортшы IBO нұсқасы бойынша алтын белбеуді иелену мүмкіндігінен айырылды. Таш­кенттің төрінде екеуі де аянбай айқасып, бәсекенің басынан аяғына дейін барын салды. Десек те Мейірімнің басымдығы бай­қалып тұрды. Оның соқ­қылары жойқын болды және дәлірек тиді. 12 раундқа созылған сайыс­та қандасымыз ұпай санымен жеңіске жетті. Сөйтіп, Мейірім Нұрсұлтанов орта салмақтағы WBC нұсқасының чемпиондық белбеуі үшін таласу мүмкіндігіне ие болады. Ал бұл атақ әлі де жеңілістің кермек дәмін тат­паған АҚШ-тың даңқты боксшысы Джермалл Чарлоға тиесілі.

Өкінішке қарай, рейтингтік бәсекелерде өзбек боксшыларына қарсы шыққан үш жерлесіміз оңбай сүрінді. Атап айтсақ, Ар­тем Пчеляков Шухрат Аб­дуллаевтан, Богдан Өтегенов Ком­рон­бек Тұрғынбоевтан нокаутпен жеңілсе, Ходжиакбар Ка­ди­рохуновтан ұпай санымен ұтылды. Әйтеуір аса ауыр сал­мақ­тағы Мұхитдин Әбдиевтің Шер­зод Мамажановқа әлі жет­кені көңілге медет болды.