Футбол • 21 Қараша, 2023

EURO -2024: Алаш жұрты аңсаған дода

140 рет
көрсетілді
7 мин
оқу үшін

Футболдан 2024 жылғы Еуропа чемпионатына іріктеу кезеңі аясында Қазақстан құрамасы сырт алаңда Словениямен кез­десіп, 1:2 есебімен жеңіліс тапты. Аталған матчқа жа­рақатына байланысты Асхат Тағыберген, Бауыржан Ис­ламхан, Бағдат Қайыров, Бахтиер Зайнутдинов қатысқан жоқ.

EURO -2024: Алаш жұрты аңсаған дода

Мықтының аты – мықты

Ойын Астана уақытымен түнгі сағат 01.45-те басталғанына қарамастан көпшілік ұйықтамай, ұлттық құрама үшін теледидар алдында тақым қысып, жанкүйер болғаны анық. Фут­бол­шыларымыз жеңіске жет­кен жағдайда өз тарихында тұңғыш рет Еуропа чемпионатының финалдық сатысына жолдама алатын еді. Әттегені-айы, сол арман-мақсат орындалмай қалды. Әйт­кенмен бұл түнде футболшыларымыз өз ойыны арқылы естен кетпес ерекше әсер, эмоция сыйлады.

Бас жаттықтырушы Магомед Адиев алғаш­қы минуттан Игорь Шацкий, Ян Воро­говский, Нұрәлі Әліп, Александр Марочкин, Сергей Малый, Марат Быстров, Ра­мазан Оразов, Исламбек Қу­ат, Абзал Бейсебеков, Ислам Чес­ноков пен Максим Самородовқа сенім артты.

Польшалық төреші Шимон Марчиняктың ысқырығы естіле салысымен Еуропаның мық­ты деген клубтарында доп тебетін сло­вениялық футболшылардың басымдығы байқалып тұрды. Десе де 16 мың жанкүйер алдын­да құрама жігіттері лайықты қар­сы­лық көрсетті. Айтпақшы, құ­рамамызды қол­дау үшін ел астанасы Любляна қаласында орналасқан «Стожице» стадионына мыңға жуық отандасымыз барыпты.

ав

Ойынның 41-минутында Игорь Шац­кийдің қақпасына белгі­ленген пенальтиден слове­ниялық Беньямин Шешко мүлт кеткен жоқ. Ал 47-минутта Рамазан Оразов таразы басын теңестірді. Бұдан кейін футболшыларымыз бірнеше шабуыл ұйымдастырғанымен, гол соғатын мүмкіндіктерін дұрыс пайдалана алмады. Есесіне, 86-минутта словениялық Бенья­мин Вербич қорытынды есепті бел­гіледі. Осылайша, Қазақстан қарсыласына 1:2 есебімен есе жіберіп, жолдамадан құр қалды.

Жалпы, бұл жерде мықтының мық­тылығын айтып, мойындау керек. Биыл Словения бізден екі ойында да басым болды. Алайда топтағы соңғы матчта, соңғы таймда тартысып қарсыласқа жол берудің өзі құрама футболшыларына еш реніш қалдырмайды.

 

Екінші мүмкіндікті мүлт жібермеу маңызды

Статистикаға үңілсек, құр­лықтық дода іріктеу сатысында отандық футболшылар Дания (3:2) мен Финляндия (1:0) құрамаларын бір мәрте тізе бүктірсе, Cолтүстік Ирландия (1:0, 1:0) мен Сан-Марино (3:0, 3:1) құра­маларын екі мәрте жеңді. Ал Дания (1:3), Словения (1:2), Финляндияға (0:1) есе жіберді.

ек

Қазақстан құрамасы Еуропа чемпионаты финалдық сатысына Ұлттар лигасы арқылы шығуына мүмкіндігі бар. Бұл жолы фут­бол­шылар 2024 жылдың нау­рыз айында Грекиямен шебер­лік байқасады. Енді екінші мүм­кіндіктен мүлт кетпеу керек.

Қазақстан құрамасы Еуропа чемпионаты іріктеу сатысында бесінші мәрте бақ сынап отыр. 2008, 2012 жылдарда топтан – 6, 2016, 2020 жылдарда 5-орын алды.

Құрлықтық доданың финал­дық сатысына Франция, Пор­тугалия, Бельгия, Испа­ния, Шот­ландия, Түркия, Англия, Аус­трия, Мажарстан, Словакия, Албания, Да­ния, Нидерланд, Швей­цария, Румыния, Сер­бия құ­рамалары шықты. Ал Германия ұйым­дастырушы ел ретінде ірік­теусіз қатысады.

Ел құрамасы H тобында 10 ойыннан кейін 18 ұпай жинап, үшінші орында қалып қойды. Бұл топта Дания 22 ұпай жинап, құрлықтық доданың финалдық сатысына бір тур бұрын жолдама алса, ал Словения құрамасының еншісіне Қазақстан құрамасынан басым түскеннен кейін 22 ұпай жазылған.

 

Құрамаға қошемет көрсетті

Кеше футболшыларды Н.На­зарбаев халықаралық әуе­жайы­нан салтанатты қарсы алу рәсіміне Туризм және спорт министрі Ермек Маржықпаев, Ас­тана қаласының әкімі Жеңіс Қасымбек, футболшылардың ту­ған-туыстары, достары және жанкүйерлер қа­тысты.

Іс-шара барысында Ермек Маржықпаев құттықтау сөз сөй­леп, бүкіл командаға жасыл алаңдағы жанкешті ойыны үшін алғысын білдірді.

– Сіздер бүкіл қазақ халқына, тіпті футболдан, жалпы спорттан алыс жандарға естен кетпес ерекше әсер, эмоция сыйладыңыздар. Өз ойындарыңыз арқылы жан­күйерлердің отандық футболға деген сенімін қайтарып, еліміздің халықаралық аренадағы имиджін көтердіңіздер. Кеше түнде бүкіл ел ұйық­тамай, сіздер үшін теледидар алдында тақым қысып, жанкүйер болды. Сіздер бұл до­­дада үлкен ерлік жасап, қазақ халқын бір мақсат аясына ұйыстыра алдыңыздар. Бұл ерліктеріңіз көпке үлгі, мыңдаған жас бала сіздер сияқты болуды, болашақта ұлттық құрама сапында ойнауды армандайды. Қазақ халқына үлкен қуаныш сыйлағандарыңызға көп рахмет, жігіттер! – деді министр.

Футболшыларды қарсы алу­ға жанкүйерлер де ерекше да­йын­дықпен келді. Олар жігіт­тер­ге жігер беретін сөздер жа­зыл­ған бан­нерлерді ұстап, құрмет ретін­де жанды дәліз жасап, сап түзеді.

Сонымен қатар футболшылар мен жат­тықтырушылар штабы барлық жанкүйерге іріктеу кезеңіндегі ойындар бойы қолдау білдіргені үшін алғыс білдірді. Команда топ­тағы шешуші матч­ты сырт алаңда өткіз­геніне қара­мастан, футболшылар осы түні бү­кіл елдің қолдауын сезгенін атап өтті.

Біздің құрама Еуропа чемпионатының финалдық кезеңіне іріктеу сайыстары арқы­лы тікелей жолдама ала алмаса да, қарт құрлық додасына шығу мүмкіндігін сақтап қалды. Енді жерлестеріміз Ұлттар лигасының плей-офф кезеңі арқылы Еуроға шығу үшін тағы бір мәрте талпынып көреді. Бұл сында біздің жігіттерді 2004 жылғы Еу­ропа чемпиондары – Грекия құрамасы күтіп тұр. Матч 2024 жылдың 21 наурызында Афинада өтеді. Гректерді жеңсек, Люк­сембург немесе Грузия құрамаларының кім жеңгені Алматыға келеді.

 

Еуро-2024-гі ел құрамасының жетістігі

  • Рамазан Оразов ұлттық құрама сапында бірінші голын соқты.
  • Қазақстан құрамасы УЕФА қауымдастығындағы Еуро­па және әлем чемпионатына ірік­теу кезеңінде ең аз 12 гол жіберді.
  • Іріктеу кезеңіндегі 10 ойында қарсыластар Қазақстанға 124 мәрте шабуыл жасап, қақ­пашы Игорь Шацкий 25 мәрте сейв жасады.
  • УЕФА қауымдастығы сапында ел құрамасы алғаш рет ЕУРО және әлем чемпионатына іріктеу кезеңі аясында ең көп 16 гол соқты.
  • Іріктеу кезеңіндегі 10 ойын­да ел құрамасы қарсылас­тарға 40 мәрте тура соққы бағыт­тады.
  • Бахтиер Зайнутдинов 4 гол соғып, осы іріктеу кезеңінде «ең үздік сұрмергені» атанды.
  • 6 жеңісі арқылы Қазақстан ТОП-100 қатарына қайта кірді.
  • Ұлттық құраманың жарқын ойынына жанкүйерлердің көңілі толып Сан-Мариноға қарсы ойынды стадионда рекордтық 30 100 адам тамашалады.