Жастар • 23 Қараша, 2023

Жастарға берілген мүмкіндік

173 рет
көрсетілді
2 мин
оқу үшін

Президенттік жастар кадр резервінің ресми сайты «Құзыреттерді бағалаудың» бірінші блогі – Ассессмент-орталықтан өткен тұлғалардың тізімін жариялады. Бұл жолы кезекті іріктеу офлайн форматта 19-24 қазан аралығында өткізілген.

Жастарға берілген мүмкіндік

Мемлекеттік басқару жүйе­сіне шығармашыл және бас­тамашыл жастарды тартуға бағытталған жобаның резервіне іріктеу алты кезеңнен тұрады: құжаттарды қабылдау, мәтіндік және сандық ақпаратпен жұмыс істеу қабілетін бағалау, ситуа­ция­лық есептерді шешу, құзы­рет­терді бағалау (бағалау орта­­лығы және құзыреттілік сұх­баты), сарапшылық комиссия­мен әңгімелесу және Ұлттық комиссия отырысы.

Ассессмент-орталық – кәсіби құзыреттердің даму деңге­йін анықтау және нақты жұ­мыс жағдайына жақын іскер­лік­­­ ойындарға тарту арқылы әлеуетті анықтау, кандидаттар қыз­метінің негізгі элементтерін модельдеу­ге­ негізделген жеке және топ­тық жағдайларды шешуде құзы­реттерді кешенді бағалау әдісі. Оған 244 үміткер қатысып, оның қорытындысы бойынша «Құзыреттерді баға­лау» кезе­ңінің екінші блогі «Құзы­­реттілік бойынша сұх­батқа» 2,22 және одан жоғары балл жинаған 170 кандидат жіберілген.

«Шымкент қалалық ден­сау­лық сақтау басқармасында бас маман қызметіндемін. Жоба туралы әлеуметтік желіден көріп, бағымды сынау үшін қатысудамын. Құжат тапсыру онлайн форматта ұйымдастырылды. Қазір төртінші кезеңге өттім. Мұнда да тәжірибе жинақтап жатырмын. Ең мықтысы кадрлық резервке өтіп, ел үшін қызмет етсін», деді қатысушы Қайрат Айдосұлы.

Құзыреттерді бағалау үшін арнайы сертификатталған баға­лау­шылар мен супервизорлар тартылған. Құзыреттілік бойын­ша сұхбат 20-24 қараша ара­лығында онлайн форматта ұйым­дастырылмақшы. Жеке тереңдетілген әңгіме жүргізу үшін кәсіби HR-сарапшылар тартылады деп жоспарланып отыр. Бұл – кандидаттың құн­ды­лықтар бағдарын көр­се­тетін құзы­рет­терін және ішкі ынта-жігерін анықтауға, белгілі бір жағдайларда кандидаттың мінез-құлық үлгілерін болжауға бағытталған.

Іріктеу тәртібіне сәйкес, ең жақсы нәтиже көрсеткен 170 үміткер үшін сұхбатқа тіркелу алдыңғы блокке ұқсас онлайн платформада жүзеге асырылады. Нәтижелері бойынша келесі кезең – «Сарапшылық комиссияда әңгімелесуге» 150-ден аспайтын кандидат жіберілетін болады.

Айта кетейік, биыл жеңім­паз­дардың есімі жел­тоқ­сан айын­да жарияланады. Қоры­тын­дысы бо­йын­ша резервке 50 адам қа­был­­­данбақшы.

 

Дариға ҚҰРМАНӘЛІ,

Л.Н.Гумилев атындағы Еуразия ұлттық университетінің 4-курс студенті