«Amanat» партиясының елімізде оқу мәдениетін дамытуға және отандық әдебиетті қолдауға бағытталған жаңа әлеуметтік жобасы Батыс Қазақстан облысында үлкен шаһардан емес, шекаралас елді мекеннен бастау алды. Алматыдан әкелінген 600-ге жуық жаңа кітап топтамасында балалар әдебиеті де, классикалық шығармалар да, жергілікті қаламгерлердің туындылары да бар. Бұл жобаның ең басты ерекшелігі – кітаптар делдалсыз, баспахана бағасымен сатылмақ. Оның үстіне жаңа орталықта әдебиетті насихаттайтын, кітап оқуға дәріптейтін іс-шараларды жүйелі түрде өткізу жоспарланған.
Кітап орталығының ашылу салтанатына «Amanat» партиясының хатшысы Шолпан Каринова арнайы қатысып, жобаның мақсат-міндетін айтып өтті.
– Бүгінгі іс-шараның басты мақсаты – қоғамымызды руханиятқа жақындату, кітап оқу мәдениетін ары қарай дамыту, елімізді кітап оқитын ұлтқа айналдыру. Сондықтан бұл біздің партиялық 17 жобаның ішіндегі үлкен идеологиялық бағытының бірі болып отыр, – дейді Ш.Таңатқызы.
Бұл күні Қазақстан Жазушылар одағы Батыс Қазақстан облыстық филиалының төрағасы, жазушы-журналист, «Орал өңірі» газетінің бас редакторы Бауыржан Ғұбайдуллин, аудандық ардагерлер кеңесінің мүшесі, ардагер ұстаз Николай Анципрович және басқа да қаламгерлер мен зиялы қауым өкілдері, ауылдың жас ақындары осы орталықтан табылды.
Ақ Жайық өңіріндегі алғашқы кітап орталығының Бәйтеректе ашылуы тегін емес. Өйткені бұл аудан – шекара шебіндегі аймақ. Рухани қазына, қазақ әдебиетінің жаңа туындылары еліміздің рухани күзетінде де қызмет ететін болады.
– Бүгіннен бастап бұл орталық жастардың да рухани қазығына айналады. Алдағы уақытта бұл жерде кітап оқуға дәріптейтін іс-шараларды жүйелі түрде өткізіп отырамыз, – дейді Бауыржан Момышұлы атындағы мектептің жас мұғалімі Құбаш Райымбек.
Іс-шара кезінде партия мен баспагерлер, полиграфистер және кітап таратушылар қауымдастығы арасында өзара ынтымақтастық туралы меморандумға қол қойылды. Яғни орталықтың кітап қоры уақтылы толықтырылады әрі бағасы да үстемесіз арзан болады деген сөз.
Батыс Қазақстан облысы
