Білім • 01 Желтоқсан, 2023

Институттың Семей филиалы ашылды

162 рет
көрсетілді
3 мин
оқу үшін

Қашан да қазақ руханиятының қайнар көзі саналатын Семей шаһарындағы Шәкәрім университеті жанынан М.Әуезов атындағы Әдебиет және өнер институтының филиалы ашылды.

Институттың Семей филиалы ашылды

Ұлт руханиятына із қал­дырған тұл­ғалардың мұра­ларын, тарихтағы тағдыр жолын түгендеп, түбегейлі зерттеу жолында үлкен іс атқарып келе жатқан бұл институттың орны айрықша. Ал оның өңір­лерде филиалдарының ашы­луының алғашқы қадамы Абай облысынан бастау ал­ғаны да көп жайды аңғартса керек. Өйткені Семей ертеден ұлылар мекені ретінде танымал.

Айтулы оқиғаға Семейдегі зиялы қауым өкілдері, тіл және әдебиеттану, өнер саласындағы  аты белгілі ғалымдар, БАҚ өкілдері мен М.Әуезов атын­дағы әдебиет және өнер инс­титутының ұжымы қатысты.

Тарихқа жүгінсек, М.Әуе­зов атын­дағы әдебиет және өнер институты мен Шәкәрім университетінің іргетасы бір жылда, 1934 жылы қаланып­ты. Құт­тықтау сөз сөйлеген Шәкәрім уни­вер­ситетінің бас­шысы Думан Орын­беков іс-шараның ерекшелігі мен маңы­зын атап өтті.

– Семей елі – өнердің қай­­на­ған ортасы. Алғашқы әуес­қойлар театрдың негізі де Семей жерінде қалан­ғаны айтылады. Өңіріміздегі театртану ғылымының дамуы, ондағы мәселелер де осы филиалдың негізгі зерттеу нысаны болмақ, – деді ректор.

Өз кезегінде М.Әуезов атын­­­дағы әдебиет және өнер институтының дирек­торы Кенжехан Матыжанов Шә­кә­рім университетінің бас­шылығына филиал­дың ашылуына қолдау көрсеткені үшін алғысын білдірді.

Филиалдың ашылуы әрі қарай «Семей филиалы: өңір­дегі әдебиеттану, өнер­тану салаларының өзекті мәселе­лері» атты тақырыптағы дөң­ге­лек үстел отырысымен жалғас­ты. Онда Қазақстанның еңбек сіңірген қайраткері, филология ғылымдарының докторы, про­фессор Арап Еспенбетов «Ғы­лыми мектеп, оның қалыптасу, даму жолдары», филология ғылымдарының кандидаты, доцент Ақмарал Смағұлова «Жас әдебиетшілер клубы», PhD Қарлығаш Әубә­кірова «Қазіргі қазақ әдебие­тінің өзекті мәселе­лері» тақы­рып­тары негізінде толымды баяндама жасады.

М.Әуезов атындағы әде­биет және өнер институтының Семей филиалы директоры қызметіне тағайындалған филология ғылымдарының докторы, профессор Бауыржан Ердембеков өз жұмыстарының негізгі бағыттарымен таныс­тырып, алдағы жоспары мен мақсат-міндеттерінен хабардар етті.

– Шапағаты жалпақ қа­зақ жұртына жеткен туған өлке­міздегі тұлғаларды дәріптеу, олардың рухани мұра­сын бүгінгі ұрпақ игілігіне жарату мақса­тында 2021 жылдан бас­тап Шәкәрім университетінде «Семей рухы» кешенді жоба­сын іске қостық. Бұл жо­ба­ның бір тармағы әдеби өлке­тану, тарих пен өнер, та­рихи өлкетану мәселе­лерін қам­ти­ды. Болашақта бұл филиал Шығыс Қазақ­стан, Пав­лодар, Абай облыс­тарында әде­биет­тану, өнер­тану ғылы­мы­­ның дамуына ықпал жасап, әдебиет, өнер бойынша өзек­ті мәселе­лердің шеші­мін тап­пақшы, – деді Б.Аман­келдіұлы.

Филиал жұмысы өңір бо­йынша өзекті тақырыптарды қарастыруды қолға алмақ. Атап айтқанда, әдеби, мәдени, тарихи өлкетану мәселелері, Абайдың «Толық адам», Шәкәрімнің «Ар білімі» кон­­цеп­циялары, жаңа түркі дәуі­рін­дегі қазақ әдебиетінің рөлі, солтүстік-шығыс өңірі ақын-жазушыларының әде­би тынысы, М.Әуезовтің Семей­дегі кезеңі сияқты сүбелі зерт­теулерімен ұлт руханиятының қоржынын толықтыра түспек.