Хоккей • 06 Желтоқсан, 2023

Будапештте бақ сынайды

91 рет
көрсетілді
1 мин
оқу үшін

10-16 желтоқсан аралығында Мажарстанның астанасы Буда­пештте шайбалы хоккейден IA дивизионындағы жастар арасындағы әлем біріншілігінің жалауы желбірейді.

Будапештте бақ сынайды

Дүбірлі додаға даярлықты жер­лестеріміз 28 қарашада Аста­надағы «Барыс Аренада» бастады. 3 желтоқсанда қарт құрлыққа ат­танып, оқу-жаттығу жиынын Будапештте жалғастырады. Сол аралықта Мажарстан және Фран­ция хоккейшілерімен жол­дастық кездесу өткізуді де жоспарлап отыр. Ал әлем біріншілігінде ел құрамасы жарыс қожайындарынан бөлек, Дания, Жапония, Франция және Аустрия құрамаларымен күш сынасады. Солардың арасынан үздік шыққан бір команда ғана келесі жылы элиталық дивизионда өнер көрсету құқығына ие болады.

Аталған жарыста еліміздің жас­тар құрамасының аға жаттық­тырушысы Сергей Старыгин мына хоккейшілерге сенім артып отыр: Қақпашылар – Владимир Никитин, Владимир Истомин, Артем Шестаков. Қорғаушылар – Артем Авдеенко, Роман Большедворский, Бейбарыс Оразов, Глеб Решетько, Мстислав Шипилин, Дмитрий Бреус, Кирилл Хан, Диар Ма­наш, Даниал Шақшақбаев. Шабуыл­шылар – Әділ Бейсембаев, Артур Гросс, Роман Ермак, Кирилл Ля­пунов, Александр Мигунов, Асан­әлі Русланұлы, Семен Симо­нов, Никита Ситников, Егор Смольянинов, Александр Ким, Дав­­лат Нұркенов, Всеволод Лог­вин және Руслан Оспанов.

Мажарстанда өнер көрсететін ойыншыларының денін Жас­тардың хоккей лигасында (ЖХЛ) күш сынасатын Астананың «Снеж­ные барсы» клубының өрен­дері құрады. Елордалық «Барыс» пен «Номад» және Өс­кеменнің «Торпедосының» сайыпқырандарына да сенім ар­тылды. Сондай-ақ біздің командада Канада, Ресей және Фин­ляндияның жастар лигасында ойнап жүрген жігіттер де бар.