Облыстық туризм басқармасы биыл өңірдің негізгі туристік орындарына навигациялық жүйені орнату жобасын іске асыруды бастаған еді. Атап айтсақ, Таңбалы тас, Түрген және Талғар, Саты шатқалдары, Ассы үстірті, Талхиз қалашығы, Көлсай, Қайыңды және Есік көлдері, Қара Каньон туристік бағыттары бойынша жұмыстар жүргізіп, нәтижесінде белгіленген нүктелерге 42 бірлік бағыттаушы белгілер мен стеллалар орнатты.
Сондай-ақ 120-дан аса демалыс аймағы орналасқан Қапшағай су қоймасының жағалауында туристік бағыт-бағдар жүйесін кеңейту жұмыстары жүргізілгенін атау ләзім.
Табиғи ресурстарға бай әрі қолайлы инвестициялық климаты бар перспективалы өңірдің айтарлықтай өндіріс әлеуеті бар. Сонымен қатар облыс барлық маусымдық туризмді дамытуға өте қолайлы. Мұнда туризмнің түрлерін, атап айтқанда киелі, экологиялық, мәдени-тарихи, кемпинг, гастрономиялық, аңшылық, этнографиялық, тіпті әлеуметтік түрлерін толықтай дамытуға болады. Бұл аймақ бүгінде елдің бизнес-қоғамдастығын және шетелдік туристерді тартуда белсенді.
«Жеңіл инфрақұрылымды құру еліміздің туристік саласын дамытудың 2023-2029 жылдарға арналған тұжырымдамасын іске асыру шеңберінде жүргізілді. Негізгі мақсаты – туризм инфрақұрылымын жақсарту, туристердің туристік-рекреациялық аймақтарға жетуін жеңілдету және туристердің бейтаныс аймақтарда ыңғайлы жүруіне жағдай жасау.
Қабылданып жатқан іс-шаралар өңірдің тартымды туристік орталық ретінде дестинацияның оң имиджін қалыптастыруға мүмкіндік береді. Сондай-ақ облыс аумағында туристердің жайлы және ыңғайлы сапарлауына және оң кері байланыс арқылы туристер санының артуына ықпал етеді», дейді «Алматы облысының туристік ақпараттық орталығы» КМҚК директорының орынбасары Азамат Жолданбаев.
Алматы облысы
