Өртті сөндіру және іздестіру-құтқару жұмыстарына 263 құтқарушы және 61 техника жұмылдырылды. Сондай-ақ волонтерлер тартылды.
Жарылыс салдарынан 12 адам зардап шегіп, 3 адам қаза тапты.
Зардап шеккендердің төртеуі облыстық ауруханаға, алтауы қалалық ауруханаға жеткізілді. Медициналық көмекке 1 адам өз бетінше жүгінген, 1 адам медициналық мекемеге жатудан бас тартты. Жалпы, зардап шеккендердің бәріне қажетті медициналық көмек көрсетілген.
«Қираған техникалық қызмет көрсету бекеті ғимаратында газ-ауа қоспасы жарылысынан 15 адам зардап шекті. Оның үшеуі көз жұмды. Құтқарушылар қирандының астынан 6 адамды алып шықты. Оның үшеуі тірі. Қазір ауруханада 10 адам емделіп жатыр. Оның біреуінің жағдайы ауыр», деді облыстық ТЖД басшысы, полковник Қасым Қайрат.
Оқиға салдарынан 7 жеңіл және 5 жүк техникасы, сондай-ақ жақын маңдағы 12 тұрғын үй зақымданған.
Полиция ҚР ҚК 292-бабы 3-бөлімі бойынша (абайсызда екі және одан да көп адамның өліміне әкеп соққан өрт қауіпсіздігі талаптарын бұзу) сотқа дейінгі тексеру шарасын бастады.
Естеріңізге сала кетейік, кеше сағат 12.36-да жүк көліктерін жөндейтін техникалық бекетте газ-ауа қоспасы жарылып, салдарынан 280 шаршы метрлік ғимарат толықтай қираған болатын. Өрт 13:52 уақытында толық сөндірілді.
