Жұмыс • 16 Желтоқсан, 2023

Жұмыс орындары ашылады

118 рет
көрсетілді
4 мин
оқу үшін

Ақтауда Тәуелсіздік мерекесі қар­саңында «Қаламқас-теңіз, Хазар және Әуезов» кен орны жоба­сының жүзеге асырылу барысы туралы басқосу өтті.

Жұмыс орындары ашылады

Маңғыстау облысының әкімі Нұрлан Ноғаев «Қаламқас-теңіз, Хазар» және Әуезов кен орындарын игеруге жа­уапты «Kalamkas – Khazar Operating» компаниясының басшылық құрамымен кездесті. Кездесуге компанияның бас директоры Құрманғазы Исқазиев және жобаның әлеуетті серіктестерінің өкілдері, «Kalamkas-Khazar Operating» ЖШС бас директорының бірінші орынбасары Андрей Решетнев, «KCOI» Rosetti Marino» ЖШС атқарушы директоры Мирко Боргези, Ilf/Doris ЖШС сату және маркетинг жөніндегі вице-президенті Бардон Франсуа, GPS «Oiltec» ЖШС және «Global Process Systems» консорциумының басшысы Браунхилл Мартин қатысты. Сондай-ақ «МРТС» АҚ бас директоры және акционері Владимир Дурнин, «CNGS Engineering Ltd» акционері Сергей Вандер, «Ersai» ЖШС бас директоры Пак Артур, «ILF Kazakhstan consulting engineers» ЖШС бас директоры Талғат Теміржанов, «ҚазМұнайГаз» ҰК» АҚ ірі мұнай-газ жобалары департаментінің бөлім бастығы Әлібек Жайқанов қатысты.

Каспий теңізінің Қазақстан секторында орналасқан «Қаламқас-теңіз, Хазар және Әуезов» кен орны стратегиялық ма­ңызға ие. 1707,17 шаршы метр аумақты алып жатқан ірі қазба орны. Оны пайдалану құқықтарына байланысты 2023 жылы қаңтарда Энергетика ми­нистрлігі мен «Қазмұнайгаз ҰК» АҚ арасындағы тікелей келісім жүргізілді. Іс барысында 2023 жылы ақпан айында «Kalamkas – Khazar Operating» компаниясы құрылып, Энергетика министрлігі мен «Қазмұнайгаз ҰК» АҚ өзара кен орнында 45 жыл мұнай өндіру туралы келісімге қол қойды.

«Kalamkas-Khazar Operating» ЖШС бас директорының бірінші орынбасары А.Решетнев «Қаламқас-теңіз және Хазар» кен орнын алдын ала базалық жоба­­лау аяқталғанын, Теңіз платформасы­ның құрылысын 2024 жылдың соңында бас­тау және жоба аяқталған соң жылы­на 4 млн тонна мұнай өндіру жоспарланға­нын айтты.

– Мұндай жоба Маңғыстау облысында алғаш рет жүзеге асырылып жатыр. Біз құры­лыс барысында екі мың жұмыс орнын құруды көздеп отырмыз, ал құрылыс аяқталғаннан кейін 300-ге дейін адам тұрақты жұмыспен қамтамасыз етіледі. Біздің мақсатымыз – жобаны 2028 жылдың екінші тоқсанының со­ңында немесе 2029 жылдың бірінші тоқ­санының басында аяқтау. Біз сондай-ақ кен орнында жұмыс істейтін жас маман­дарды оқытуды жоспарлап отырмыз, – деді Андрей Решетнев.

Бұл кен орнындағы мұнай ресурс­тарының жалпы қоры 81 миллион тоннаға бағаланады. «Қаламқас-теңіз» жобасы шеңберінде жағалаудан 64 шақырым қашықтықта металл конструкциялардан теңіз платформаларын құру көзделеді. «Қаламқас-теңіз, Хазар және Әуезов» кен орындарын игеру жөніндегі жоба шеңберінде 6 миллиард доллар көлемінде тікелей инвестициялар тарту жоспарлану үстінде. Ресейлік «Лукойл» мұнай компания­сы осы жобада шетелдік стра­тегиялық серіктес болады.

– Мемлекет басшысы Қасым-Жомарт Тоқаев жақында ел экономикасына инвестициялар тарту жөніндегі жұмыстың тиімділігін жақсарту шаралары туралы Жарлыққа қол қойды. Бұл отандық және шетелдік инвесторлар жүзеге асыратын ин­вестициялық жобалардың осы өңірдің ғана емес, бүкіл елдің экономикалық әлеуетін арт­тырудағы маңыздылығын көрсетеді. Бұл жоба шешуші рөл атқарады, мен оған жауап­кершілікпен қарауға шақы­рамын. Бола­шақ қатынастарды жақ­сарту үшін бар­лық қажетті қадамд­арды, соның ішінде эко­ло­гиялық заңнаманы сақтауды, тығыз жұ­мыс байланыстарын дамытуды және өн­діріс­тік қауіпсіздікке жауапты болу керек екенін айтқым келеді. Біз білік­тілігі жоғары жергілікті мамандарды тарту­ға, сондай-ақ қосымша дағдыларды қа­жет ететіндерді даяр­лау мен оқытуға ұмты­ла­мыз, – деді аймақ басшысы Нұрлан Ноғаев.          

 

Маңғыстау облысы