Жастар • 20 Желтоқсан, 2023

Үздік 30 жобаға «Тәуелсіздік ұрпақтары» гранты табысталды

162 рет
көрсетілді
2 мин
оқу үшін

Бүгін Астанада бизнес, ғылым, мәдениет, медиа және ақпараттық технологиялар саласындағы үздік 30 жобаның авторына «Тәуелсіздік ұрпақтары» гранты табысталды. Салтанатты іс-шараға Мәдениет және ақпарат министрі Аида Балаева, Мәжіліс депутаттары, Президент жанындағы жастар саясаты кеңесінің өкілдері, мемлекет және қоғам қайраткерлері қатысты, деп хабарлайды Egemen.kz министрліктің баспасөз қызметіне сілтеме жасап.

Үздік 30 жобаға «Тәуелсіздік ұрпақтары» гранты табысталды

Фото: gov.kz

Мемлекет басшысы 2021 жылы «Тәуелсіздік ұрпақтары» грантын жас отандастардың жаңа және қолданыстағы бастамаларын қолдау мақсатында тағайындаған болатын. Грант аясында 63 адам өз жобасын Қазақстанда ғана емес шетелде де түрлі салаларда табысты жүзеге асырып отыр.

Министр Аида Балаева салтанатты рәсімге қатысушыларды құттықтады.

«Біз үлкен өзгерістер дәуірінде өмір сүрудеміз. Жастарға дұрыс таңдау жасау, сенімге лайық азамат болу, өзін-өзі дамыту, оқу және еңбек арқылы табысқа ұмтылу сияқты ең маңызды жауапкершілік жүктелген. Мемлекет басшысы Қасым-Жомарт Тоқаев жастардың дамуына, оларға  жаңа және ауқымды мүмкіндіктер ашуға ерекше көңіл бөледі. Бар үмітіміз - еңбек пен білімнің жолымен жүретін, адамдық қадір-қасиеттің мәнін терең түсінетін, ата-баба дәстүрін қастерлейтін жастарда. Бүгінгі берілген грант - сіздердің табандылықтарыңыз бен таланттарыңыздың, қажырлы еңбектеріңіз бен адалдықтарыңыздың, қоғам үшін маңыздылығыңыз бен өз әлеуетіңізді мойындауыңыздың сыйы. Бұл құрмет одан әрі даму мен ынталануға жетелесін. Әрбір қадамдарыңыз жаңа жетістіктер мен жаңалықтарға жол ашып, шығармашылық, ғылыми, іскерлік идеяларыңыз еліміздің дамуына елеулі үлес қосуға мүмкіндік берсін. Сіздер  Қазақстанды бұдан да әрі көркейтетіндеріңізге сенемін!», деп құттықтаған ведомство басшысы үздік жобалардың 30 авторына 3 миллион теңгеден грант сыйлығын тапсырды.

Биыл конкурсқа қатысу үшін 5 бағыт бойынша 3000-нан астам түскен өтінімдердің қатарында Қазақстанның мәдени мұрасын насихаттауға, халықтық мәдени дәстүрлер мен өнерді ілгерілетуге, IT саласындағы ғылыми зерттеулерді, стартаптар мен жобаларды, экономиканың негізгі секторларындағы креативті бизнес идеяларды іске асыруға бағытталған жобалар бар.

Елімізде 1992 жылдан бастап дәстүрлі түрде ғылыми, шығармашылық, креативті қызметпен айналысатын, сондай-ақ спорт саласында жетістіктері бар жастарға «Дарын» мемлекеттік жастар сыйлығы беріледі. Сонымен қатар еліміздің жас жазушылары мен ақындары Президенттік арнаулы әдеби сыйлықтың иегері атанса, дарынды ғалымдар Д.Қонаев атындағы сыйлықтар мен ғылыми стипендиялар алады.