Осы бәсекелер барысында БАҚ өкілдеріне сұхбат берген аталған жарыстың басты демеушісі «Халық» қорының Алматы облысы бойынша филиалының директоры Ғалымбек Жақсылық: «Жастарымызды бала кезінен дұрыс тәрбиелеп, оларға оң бағыт-бағдар беру өте маңызды. Соны қаперге ала отырып, біз жеткіншектерді спорт пен саламатты өмір салтына баулуға бағытталған осы игі іс-шараны қолға алдық. Міне, бүгін каратэшілеріміз Алатау баурайында бас қосып, дүйім жұрттың алдында өз шеберліктерін көрсетуде. Тамырын тереңге тартқан каратэнің өзіндік философиясы мен қағидаттары бар. Ең бастысы, ол адамды ізгілікке, тәртіпке, жауапкершілікке үйретеді. Осындай баға жетпес құндылықтарды әрқайсысымыз өз балаларымыздың бойына сіңіруіміз қажет. «Халық» қоры осы шарамен ғана шектеліп қалған жоқ. Мәселен, биыл «Ауыл футболы» деген жобаның бас демеушісі болдық. Сол арқылы шалғайдағы елді мекендерде тынбай еңбек етіп жатқан 100 балалар жаттықтырушысын УЕФА-ның талаптарына сай D категориясы бойынша оқытып жатырмыз. Сонымен қатар ауылдың 100 командасын қажетті құрал-жабдықтармен қамтамасыз еттік», деп біраз тартымды әңгіменің тиегін ағытты.
«Қазақстанның барлық стильдегі каратэ федерациясы» республикалық қоғамдық бірлестігі ұйымдастырған жарысқа келер болсақ, балғын спортшылар мен жас өрендер арасында айрықша шеберлігімен көзге түскендер аз болған жоқ. Солардың арасынан Ясмина Ясинжанова, Алуа Азатхан, Нұртілек Елжанов, Диас Нұрлан, Шапағат Қуандық, Әміхан Еркін, Сырым Асқар, Балауса Қуандық, Аяжан Мырзахмет және Жангүл Мырзасадық сынды каратэшілерді ерекше атап өтуге болады. Олардың барлығы да бас жүлдені олжалады. Сондай-ақ шетелден келген жас жеткіншектердің де біразы өздерін жақсы қырынан көрсетіп, жеңіс тұғырына көтерілді.
«bel-bilek» халықаралық шығыс жекпе-жегі фестивалі аяқталғаннан кейін жеңімпаздар мен жүлдегерлер түрлі-түсті медальды мойнында жарқыратса, осы спорт түрін дамытуға елеулі үлес қосқан 50 жаттықтырушыға алғысхат пен естелік сыйлық табыс етілді.
