Қоғам белсенділерінің пікірінше, бұл қоршаған ортаға орны толмас зиян келтіруі мүмкін. Полиция оқиғаға байланысты қылмыстық іс қозғады.
Алматының "Ақбұлақ" шағын ауданында 40-қа жуық тоғыз қабатты үй, мектеп және жақын маңдағы тұрғын үй кешендеріне автотұрақ салу үшін 17 гектар аумақта жасыл алаң түгелдей шабылған. Құрылыс компаниясы ағаштарды кесуді 9 желтоқсанда бастапты, бірнеше апта ішінде 2800-ге жуық ағаш кесілген.
Құрылыс компаниясының мәліметінше, олардың қажетті рұқсаттары бар, бұған дейін тұрғындармен кездесу де өткізген.
- Рұқсат алған бойда ағаштарды кесуге кірістік. Біз мұнда тұрғын үй кешенін, оған қоса 1200 орындық мектеп пен автотұрақ салуды жоспарлап отырмыз. Біз алдын ала дайындалдық, мұның бәрін тұрғындармен 3-4 ай бойы талқыладық. 3-4 рет кездесулер болды. Тек жиналыс емес, барлығын ресми түрде куәландырдық, – деп жазды КТК арнасы "Qazaq Stroy" ЖШС директорының орынбасары Дархан Марқұмовтың сөзін.
Бірақ белсенділер құрылыс компаниясының әрекетімен келіспейді.
- Салмау керек. Жалпы алғанда, мұндай құрылыстарды тоқтату керек. Президент бірнеше рет тапсырма берді. Алайда Алматыда бұл бұйрық орындалмай жатыр. Мәселе бұл заңсыздықтың заңдастырылғанында. Құрылысшының бұзуға және ағаш кесуге рұқсаты бар екен, – дейді қоғам белсендісі Санжар Боқаев.
Құрылыс компаниясының ағаштарды кесуге рұқсаты бар екені белгілі болды. Алайда әкімдік олардың рұқсат етілгеннен көп ағаш кескенін айтады.
- "Qazaq Stroy" ЖШС мердігер ұйымы 176-ға жуық ағаш пен 40 түп жабайы бұталарды, барлығы 216 бірлік жасыл алқапты заңсыз кескені анықталды. Яғни, бұл өсімдіктер рұқсат беру құжаттарында көрсетілмеген, – деді Алматы қаласы экология және қоршаған ортаны қорғау басқармасының бас маманы Нұркен Ақмырза.
Полиция заңсыз ағаш кесу фактісі бойынша қылмыстық іс қозғады. Заңды түрде жойылған ағаштарға келер болсақ, компания олардың орнына 28 мыңға жуық жаңа ағаш отырғызуға уәде берді.
