Аймақтар • 06 Қаңтар, 2024

Кеткеніне үш-ақ ай болған: Жетісу облысында тағы бір сарбаз көз жұмды

2134 рет
көрсетілді
3 мин
оқу үшін

Қарулы күштер қатарында небәрі үш ай қызмет еткен сарбаз қаза тапты, деп хабарлайды Egemen.kz.

Кеткеніне үш-ақ ай болған: Жетісу облысында тағы бір сарбаз көз жұмды

Қорғаныс министрлігі жігіт менингиттен көз жұмды десе, туыстары оның ауырып қайтыс болғанына сенбей отыр.

Астана телеарнасының жазуынша, 2023 жылдың күзінде Әмір Байтұрғанов әскерге шақырылған. Марқұмның әкесі оның өз болашағын Отанға қызмет етуге және қорғауға арнағанын, әскерге шын ықыласымен барғанын атап өтті. Сонымен қатар баласының спортпен шұғылданып, шымыр болғанын айтады. Алайда марқұмның отбасы 21 желтоқсанда қаралы хабарды естиді.

- Түнгі сағат 03:00-де әскери бөлімнен қоңырау шалды. Олар ұлымның есін жия алмай, ес-түссіз жатқанын хабарлап, менің бөлімге дереу келуімді сұрады. Сол күні таңғы сағат 06:20-да ұлым есін білмей көз жұмды, – дейді марқұмның әкесі Мұрат Байтұрғанов.

Атыс дайындығы сабақтарынан кейін Әмірдің жағдайы нашарлай бастаған. Сол күні ол жоғары дене қызуымен ауруханаға түседі. Бір уақытта әскери бөлімдегілер оның қызуын басқандай болғанымен, сарбаздың ауруы қайта асқынған.

- Кешке қарай науқастың жағдайы нашарлады. Дене қызуы экстремалды жағдайға дейін көтерілді. Осыдан кейін науқас орталық аудандық ауруханаға жеткізілді. Сот-медициналық сараптаманың деректері бойынша өлімнің алдын ала себебі жедел инфекциялық ауру менингит деп анықтама берілді, – деді Бас әскери-медициналық басқарма басшысының орынбасары Берік Ілиясов.

Алайда марқұмның туыстары балаларының менингиттен мерт болғанына сенбей отыр. Жақындарының айтуынша, ол ұзақ уақыт бойы бүйрегінің ауырып жүргеніне шағымданған. Бірақ уақытылы ем-домын ала алмаған.

- Бұған дейін бүйрегі ауырғанын медициналық бөлімдегілерге айтып, бірнеше рет жүгінген. 28 қарашада ол ультрадыбыстық зерттеу жүргізу үшін бөлімнің медициналық қызмет басшысына барады. Тек 6 желтоқсанда олар қалаға барып, ультрадыбыстық зерттеу жүргізіп, екі жақты пиелонефрит диагнозын қойды. Оны сол күні-ақ бірден әскери госпитальға жатқызғанымен, 3 күннен кейін шығарып жібереді, – деді марқұмның әкесі.

Әкесі ұлымен жиі хабарласып тұрғанын айтады. Ұлының айтуынша, казармаға лауазымды тұлғалар тексеріспен келген. Басшылары қалай тексеріс бітеді, дереу емханаға жатқызылады деп айтқан. Дегенмен жағдай мүлде басқаша болған.

Туыстары балаларының созылмалы пиелонефриттен көз жұмды деген пайымда. Десе де, Қорғаныс министрлігі сарбаздың бүйрек ауыруынан қайтыс болғанын жоққа шығарды.

- 5 желтоқсанда жасалған сот-медициналық деректерге сәйкес және аурудың тарихын зерттей келе, өлім себебі арасында еш байланыс жоқтығын көрсетеді, – деді Берік Ілиясов.

Марқұмның әкесі Бас прокуратураға тергеу барысын ерекше бақылауға алуды сұрап отыр.