Фото: Туризм және спорт министрлігі
Министрлікке қарасты Спорт және дене шынықтыру комитетінің баспасөз қызметінің мәлімдеуінше, Паралимпиаданың квалификациялық регламентіне сәйкес К44 санатында 80 келіге дейінгі салмақ бойынша паратаеквондошы Нұрлан Домбаев, +80 келі салмақта Нышан Өмірәлі және -57 келі салмағындағы Кәмиля Досмалова биыл Парижде өтетін дүбірлі доданың жолдамасына ие болған.
Спортшыларымыз әлемдік рейтингтің көрсеткішіне сәйкес, топ 20 үздік спортшылар қатарына енген.
Осы күнге дейін Қазақстан параспортшыларында Париж-2024 ойындарының 5 лицензиясы бар: паражеңіл атлетика, парапауэрлифтинг, волейболды отырып ойнау, параканоэ, паражүзу.
Еске салайык, 2020 жылғы Токио Паралимпиадасында Қазақстан ұлттық құрамасынан 25 спортшы 5 медаль (1 алтын, 3 күміс, 1 қола) жеңіп алып, жалпы есеп бойынша 48 орынды иеленген еді.
Айта кетсек, Париж шаһарында XXXIII жазғы Олимпиада шілденің 26-сы мен тамыздың 11-і күндері аралығында өтсе, ХVІІ Жазғы Паралимпиада 28 тамыз - 8 қыркүйек аралығында өтеді.
