Бұл мәдени ошақтар – жастардың рухани дамуы мен келешек ұрпақтың жақсы өнеге-тәрбие алуына ықпалы зор орталықтар. Мұны ел ертеңіне, қоғамның өнер әрі мәдени бағытына мән берген қала билігінің өте дұрыс шешімі делік. Сонда да осы мәдени орталықтарға, театрларға байланысты елорда тұрғындары мен қонақтарына қатысты қолайсыз бір жайт бар. Мәдениет ошақтарының үшеуінің де негізін «жастар» деген сөз құрап тұрғандықтан, «жастар театры» деп қысқартып айтқанда, көрерменнің біразы шатысып көздеген театрдың орнына жастардың басқа ғимаратының есігін қағатынына куә болып жүрміз. Кейде өзіміз де шатасып қалатын кездер болады. Бұл бұқара халыққа үлкен қолайсыздық тудырады.
Бұдан бөлек, рухани байлығымызды кеңінен қамтып, құрметтеу тұрғысынан қарасақ, аталған үш мәдениет ошағына тән бір тарихи кемшілік ойға келеді... Қазір «Жастар театры» орналасқан ғимаратта 2000 жылы «Ақ Орда» опера және балет театры ашылған еді. Осы жылы театр ұлттық мәртебеге ие болып, оған қазақтың жаһанға әйгілі күміс көмей, жезтаңдай әншісі, 24 жасында-ақ «КСРО халық әртісі» атағын алған Күләш Байсейітова есімі берілді. Театрдың алғашқы маусымы 2000 жылдың 14 қазанында М.Төлебаевтың «Біржан-Сара» операсымен ашылды. Операны сахнаға КСРО Халық әртісі, Мемлекеттік сыйлығының лауреаты, Халық қаһарманы, режиссер Әзірбайжан Мәмбетов шығарды. Айрықша атап өтетін жайт, 2004 жылы Күләш Бейсейітова атындағы Ұлттық опера және балет театры Халықаралық музыкалық театрлардың ассоциациясының құрамына мүше болды. Бұл театр әртістері еңбегіне берілген жоғары баға еді. Ал 2013 жылы жаңадан «Астана опера» мемлекеттік опера және балет театры еңселі ғимараты пайдалануға беріліп, аталған театр ұжымы сол жаққа көшірілгенде, атақты әншіміз Күләш Байсейітова есімі қалың қауымға белгісіз себептермен «ұмытылып», ескерілмей қалды. Дүние жүзіне танылған әнші есімі жаңа опера және балет театрына да бірге көшіріліп, Күләш Байсейітова атындағы опера театры аталуы заңды болар еді. Бірақ шешім дұрыс қабылданбады. Мүмкін әлі де кеш емес шығар... Ал бұл ұсыныс шешімін таппаса, «Жастар театрын» «Күләш Байсейітова атындағы Жастар театры» деп атаған дұрыс болар еді.
«Жастар сарайы» туралы. Аса көрнекті ақынымыз, сталиндік қуғын-сүргіннің жазықсыз құрбаны Мағжан Жұмабаевтың «Мен жастарға сенемін» деген өлеңінің тәрбиелік мәні зор екені белгілі. Жалынды ақын өскелең ұрпақтың кемелденіп қалыптасуын құптады, олардың айбынды да қайсар жасампаздықтарынан үлкен үміт күтті. Сондықтан «Жастар сарайы» Мағжан Жұмабаев атымен аталса, қалың жұрттың ой-арманынан шығары даусыз.
Ал «Музыкалық жас көрермен театры» Қадыр Мырза Әлі атындағы «Музыкалық жас көрермен театры» деп аталса, абыройлы іс болар деген ойдамыз. Осы ұсыныстар жүзеге асса, халқымыз ардақтаған Күләш Байсейітова, Мағжан Жұмабаев пен Қадыр Мырза Әліге арналған лайықты құрмет болары сөзсіз. Сонымен қатар көрермен қауым да үш театрды шатастырмай, уақтылы өзіне керек мәдениет ошағына жол табар еді. Осы ұсынысты қалың жұртшылық, зиялы қауым мен Астана қаласының әкімі қолдайды деген үміттеміз. Өйткені ұлт перзенттерін құрмет тұту, елге деген жемісті де қайырлы еңбектерін лайықты ұлықтау – бүгінгі ұрпақтың парызы.
Нақыпбек СӘДУАҚАСТЕГІ,
заңгер, публицист
