Осыған орай кеше Президент жанындағы Орталық коммуникациялар қызметінде өткен брифингте Қорғаныс министрлігі Тәрбие және идеологиялық жұмыс департаментінің басшысы, әділет полковнигі Тілеухан Басқожаев сөз сөйлеп, Кеңес одағының батыры, армия генералы Сағадат Нұрмағамбетов пен Қазақстанның Халық қаһарманы Рахымжан Қошқарбаевтың 100 жылдығына арналған іс-шаралар туралы айтып берді.
25 мамырда Халық қаһарманы, тәуелсіз Қазақстанның бірінші Қорғаныс министрі, армия генералы Сағадат Нұрмағамбетовтің туғанына 100 жыл толады. Қорғаныс министрлігі өкілінің айтуынша, осы күнге орай батырдың туған жері Ақкөл қаласында Сағадат Нұрмағамбетов атындағы алаңға ескерткіш орнатылмақ. Ақмола облысының әкімдігі алаңды абаттандырады. Еліміздің бас қаласында Сағадат Нұрмағамбетов атындағы көшеге ескерткіш дайындау және оны орнату жұмыстарын елорда әкімдігі ұйымдастырады.
– Құрлық әскерлерінің әскери институтында курсанттардың өмірінен сыр шертетін «Әскери ант» телехикаясының түсірілімі аяқталды. Онда Отан алдындағы борыш, ар-намыс, жауапкершілік және сүйіспеншілік тақырыбы паш етіледі. Туындының тұсаукесері отандық телеарнада 2024 жылдың 7 мамырында өтпек, – деді департамент басшысы.
Бұған қоса, Мәдениет және ақпарат министрлігімен бірлесіп армия генералының өмірі мен қызметі туралы деректі өмірбаяндық фильмді республикалық телеарналардан көрсету жоспарланып отыр. Қарулы Күштер ардагерлерінің баспа басылымдарына сұхбаттары, очерктері мен естеліктері жарияланып, телесюжеттер мен деректі фильмдер теледидардан көрсетіледі және әлеуметтік желілерге шығару үшін бейнежазбалар дайындалып жатыр.
Қорғаныс министрлігі тақырыптық баннерлер, билбордтар жасау үшін логотип дайындап, жергілікті атқарушы органдарға жіберді. Сонымен қатар Мәдениет және ақпарат министрлігі әзірлеген пошта маркасы да шығарылады.
Т.Басқожаевтың айтуынша, биыл маусым айында Алматыда Құрлық әскерлері әскери институтының «Әли» оқу-жаттығу орталығында армия генералы Сағадат Нұрмағамбетовті еске алуға арналған «Айбын» халықаралық әскери-патриоттық жастар жиыны өтеді. Жиынға қатысуға Ұжымдық қауіпсіздік туралы шарт ұйымына мүше мемлекеттердің, сондай-ақ Әзербайжан мен Өзбекстанның командалары шақырылды.
Қарулы күштердің Мемлекеттік әскери-тарихи музейі еліміздің он қаласында «Халық жүрегіндегі қаһарман» атты көшпелі көрмелер өткізбек. Іс-шаралар 17 қаңтардан Алматыдағы орталық мемлекеттік музейден бастау алады.
– 1924 жылы 19 қазанда туған Халық қаһарманы Рахымжан Қошқарбаевтың жүз жылдығын мерекелеу бойынша бірқатар ауқымды іс-шара жоспарланған. Барлық гарнизонда әскери қызметшілердің, Қарулы күштер ардагерлерінің, әскери-патриоттық ұйымдар өкілдерінің қатысуымен кездесулер, дөңгелек үстелдер, акциялар, челлендждер өтеді, – деді Т.Басқожаев.
