Ауылға соңғы 5 жылда 2,4 млрд теңге қаражат қаралыпты. Осы ақшаның 1,3 млрд теңгесі мемлекетке қол жаймай, туған топырағын түлеткен меценат, Қазақстанның Еңбек ері Имамзада Шағыртаевтың демеушілігі есебінен бөлінген. Тұрғындарды тұрақты жұмыспен қамтып келе жатқан кәсіпкер азаматтарды игілікке жұмылдырып, ауылын ажарландырып отыр.
Елді мекендегі 120 орындық «Таң бөбегі» балабақшасы, спорт кешені, ауылға кіретін жол бойындағы жарық шамдар, бүгінде өнім шығарып жатқан ет өңдеу цехы – осы «Таң LTD» компаниясының тартуы. Он үш жылдан бері үздік нәтиже көрсеткен диқандар мен механизаторларға бірнеше автокөлік, 300 млн теңге қаржылай сыйақы берген шаруашылық та осы. Ауылдың 250-ден астам адамын жұмыспен қамтыған серіктестік әкімдікпен бірлесіп тұрғындардың бау-бақша егуі үшін 60 гектар жер үлестірген.
Өткен жылы Таң ауылындағы бірқатар әлеуметтік нысандар мен автомобиль жолдарын жөндеуге жоба-сметалық құжаттар әзірленіп, бюджет есебінен қаржыландыруға ұсынылыпты. Биыл 4 жобаға облыстық бюджеттен 813,9 млн теңге бөлінген. Мәдениет үйін күрделі жөндеудің жоба-сметалық құжаттамасы мен эскиздік жобасын әзірлеуге Алматы, Түркістан қалаларынан тәжірибелі сәулетші мамандар қатысып отыр. Жоба құны – 377,4 млн теңге. Жариялаған мемлекеттік сатып алу конкурсының жеңімпазы жуырда анықталады.
Ауыл тірлігін түлете түсу үшін «Таң-Жаңақоныс» автомобиль жолын қайта жаңғыртуға – 287,6 млн, «Таң-Самұрат» автомобиль жолын қайта жаңғыртуға – 118,8 млн, қосымша су көтеру ұңғымасын қайта қазуға 30 млн теңге бөлінген. Бұл жобалардың мемлекеттік сатып алу рәсімдері жүргізілу үстінде. Ауылға кіреберістегі «Бозарық» каналы көпірін қайта жаңғыртуға және 4 көшені жарықтандыруға жоба-сметалық құжаттама әзірленіп, бюджеттік өтінім жолданыпты. Ішкі көшелерді жөндеу жұмыстары аудандық бюджет есебінен іске асырылатын болады. Қазіргі елді мекендерде бейберекет салынған құрылыстар жоқтың қасы деуге болады. Ауылдан түсетін өндірістік ғимараттар мен «Таң LTD» ЖШС демеушілігімен салынатын жаңа тұрғын үйлердің орындары белгіленіп, эскиздік жобаға енгізіліп қойды.
Өңірде «Ауылдық аумақтарды дамытудың 2023-2027 жылдарға арналған тұжырымдамасы» аясында елді мекендердің алдағы жоспары, өркендеу мүмкіндіктері қарастырылып отыр. Былтыр ауыл игілігіне мемлекеттік бюджеттен 18 млрд теңге жұмсалған. «Ауыл – ел бесігі» аясында 47 елді мекенде 216 жобаны жүзеге асыруға 12 млрд 400 млн теңге бөлінген. Биыл осы бағдарлама шеңберінде 11 млрд теңгенің 67 жобасы межеленіп отыр.
«Ауыл аманаты» бағдарламасы бойынша 3 млрд теңгенің 404 жобасы жүзеге асты. Осы жылы 6 млрд теңгенің 800-ден астам жобасы іске асырылмақ. Жуырда өткен ауылды дамыту жолдары пысықталған мәжілісте облыс әкімі Нұрлыбек Нәлібаев өткен жылдан бастап «Үлгілі елді мекен» жобасы аясында жеңімпаз 12 елді мекенге заманауи үлгідегі 29 арнайы техника берілгенін атап өтті. Былтыр 12 ауылдық елді мекенге газ кіргізіліп, осы күні өңірде «көгілдір отын» игілігін көріп отырған ауыл саны 34-ке жетті. Биыл 4 млрд теңгеге тағы 12 елді мекенге газ тартылады.
Қызылорда облысы
