Суретте: Мұқан Ағзамов шәкірттерімен
Өскемен қаласынан 35 шақырым қашықтықта Ұлан ауданына қарасты Айыртау деген ауыл бар. Мұқан Ағзамов ұзақ жылдан бері аталған ауылда тұрады. Техника ғылымдарының кандидаты, профессор, ауыл шаруашылығының майталман маманы. Кезінде 10-нан аса рационализаторлық жаңалықтарды өндіріске енгізген, 20-дан аса өнертабыстық патенті бар. Мұқан Сағидоллаұлының шегірткені құртуға арналған қондырғысын өңірдің шаруа қожалықтары кеңінен пайдаланған. Мұқанның өзінің де қожалығы бар, еңбекқор азамат. Бұған қоса Сәрсен Аманжолов атындағы Шығыс Қазақстан университетінде жас кадрларға өз тәжірибесін үйретіп, дәріс оқиды. Ұзақ жылдар гір спорты мен қол күресінен Дүниежүзілік федерацияның вице-президенті және президенті болды. Әлем чемпионаттары мен Азия біріншіліктерінде гір спорты мен қол күресінен 12 рет жүлдегер, 5 рет чемпион атанды.
– Хайдарабад қаласындағы Әлем чемпионатына біз өз қаржымызбен бардық. Стритлифтингтен өткен Әлемнің 10-біріншілігіне 18 мемлекеттен кілең «сен тұр, мен атайын» деген мықтылар жиналды. Тартысты өткен жарыста мен 2 алтын, інім Ерік 2 алтын, ұлым Жүрсін (барлығы Ағзамовтар) 2 алтын, Иван Мальков 1 алтын, 1 қола, Еріктің ұлы Жан 2 күміс медальды иеленді. Айта кету керек, Жан Ағзамов өткен жылы стритлифтинг Азия федерациясының президенті болып сайланды. Бұл спорт Қазақстанда жедел дамып келеді. Ұлым Жүрсін өткен жылы стритлифтинг Дүниежүзілік федерациясының вице-президенті болып сайланды. 2024 жылы біз әлем чемпионаттары мен халықаралық жарыстарға қатысамыз. Аманшылық болса, шілде айының 15-21 аралығында Өскеменде стритлифтингтен Әлем чемпионатын өткізуге әзірленіп жатырмыз. Бұрындары да қол күресі мен гір спортынан әлем және Азия чемпионаттарын өткізген тәжірибеміз бар, – дейді Мұқан Ағзамов.
Ауылда тұрса да, аталған спорт түрлерінің дамуына өлшеусіз үлес қосып жүрген Мұқан сияқты азаматтарға алғыстан басқа айтарымыз жоқ.
Оңдасын ЕЛУБАЙ,
Қазақстанның құрметті спорт қызметкері
Шығыс Қазақстан облысы,
Ұлан ауданы
