Жыл сайын тағайындалатын Мемлекеттік стипендия мәдениет пен өнер, шығармашылық саласының өкілдері және дарынды жастарды қолдауға бағытталғаны белгілі. Министр марапаттау іс-шарасын жас қаламгерлерге мемлекеттік қолдау көрсету, дарынды ақын-жазушылардың жаңа буынын қалыптастыру мақсатында тұңғыш рет берілген Президенттік арнаулы әдеби сыйлықты тапсыру рәсімімен бастады.
«Әдебиет пен өнер саласы өкілдеріне Мемлекеттік сыйлық беру елімізде дәстүрлі іс-шараға айналды. Әр саланың талантты өкілдеріне қолдау білдіру қоғамның алға басуына, салаға келген жастарға серпін беруге ықпал етеді. Бұл – жазушының да, өнер адамының да жанкешті еңбегіне жасалған құрмет пен қолдау. Еліміздің қай өңірінде де болмасын қоғамның дамуына атсалысып жүрген әр азаматтың еңбегі бағалануы қажет. Бұл жолғы марапат осы үдеден шықты деген сенімдемін. Бүгінде елімізде қай саланы алсақ та түйткілді мәселе жоқ деп айта алмаймыз. Қазіргі кезде тиісті министрлік өңірлер бойынша арнайы сараптама жүргізіп, нақты мәселелерді анықтау бағытында жұмыстарды жалғастырып келеді. Дегенмен кітапхана ісі, кітап шығару, білім беру саласын жақсартуға бағытталған барлық іс-шараны нәтижелі ету аса маңызды. Ал әдебиет пен өнерге жаңа қадам басып, өз еңбектерімен еленген жастарға деген сенім зор. Өткен жылдан бастап «Халық жазушысы» мәртебесі қайта жанданды. Бұл мәртебе жас қаламгерлер үшін биік шың іспетті дейтін болсақ, жастардың осы биік шыңға көтерілуіне тілектестік білдіремін», деді министр.
Жиын барысында министр қазақ әдебиетінің көрнекті өкілдері Дулат Исабеков, Бексұлтан Нұржеке, Кәдірбек Сегізбаев, Иранбек Оразбаев, Марфуға Айтқожа, Ханбибі Есенқарақызы, Бахытжан Қанапиянов, Нұрғали Ораз, Бауыржан Жақып, өнер саласының қайраткерлері Асанәлі Әшімов, Нұрғали Нүсіпжан, Тұңғышбай Жаманқұлов, Нүкетай Мышбаева, Есмұқан Обаев, Амандос Ақанаев және басқаларға Мемлекеттік стипендияны табыс етті. Сонымен қатар жеңімпаз жастар қатарында Канн халықаралық фестивалінің жүлдегері, актриса Самал Есләмова, камералық ансамбль әртісі Толқынхан Самғар, скрипкашы Еркебұлан Сапарбаев, суретші Ренат Елубаев, Абай атындағы қазақ ұлттық опера және балет театрының солисі Андрей Трегубенко, «Астана опера» мемлекеттік опера және балет театрының солисі Назым Сағынтай, М.Горький атындағы мемлекеттік академиялық орыс драма театрының актері Максим Ященко марапатталды.
Президенттік арнаулы әдеби сыйлыққа үміткер 18-35 жас аралығындағы қаламгерлерге арналған байқау «Проза», «Поэзия», «Драматургия» және «Балалар әдебиеті» аталымдары бойынша өткені белгілі. Байқауға қатысқан 50-ден астам қатысушының ішінен 17 талапкер – «Балалар әдебиеті», 9 қатысушы – «Драматургия», 13 қатысушы – «Поэзия», 14 қатысушы «Проза» аталымы бойынша өтінім берген.
Осы бәйгеден оза шапқан жеңімпаздар қатарында комиссияның шешімімен «Проза» аталымы бойынша «Квант» туындысы үшін Досхан Жылқыбай, «Поэзия» аталымында «Қалалық құстар» өлеңдер топтамасы үшін Еділбек Дүйсенов, «Балалар әдебиеті» аталымы бойынша «Атың озсын, азамат!» топтамасы үшін Олжас Қасым, «Драматургия» аталымы бойынша «Тау көтерген Толағай» драмалық туындысы үшін Айтолқын Әшімова Президенттік сыйлықтың иегері атанды.
Осы орайда мемлекеттің әдебиет және өнер саласында жүрген жастарға қолдау білдіріп жатқанын зор қуанышпен қабылдап, оларға жылы лебізін білдірген Қазақстанның халық жазушысы Бексұлтан Нұжеке әсіресе балалар әдебиетіне көрсетілген қолдаудың маңыздылығына тоқталып, Президенттік арнаулы әдеби сыйлыққа деректі шығармалар аталымын қосу қажет деген ұсынысын білдірді. Ал ақын, Мемлекеттік «Дарын» жастар сыйлығының лауреаты Ерлан Жүніс жас қаламгерлерді құттықтап, олардың бойындағы жастық жігер, сыншылдық, отансүйгіштік қасиеттер ұлттық әдебиетіміздің кемелденуіне жұмсалса деп тілек айтты.
АЛМАТЫ
