Бұған дейін Maqsut Narikbayev University (MNU) ICAI мүшелігін алған Қазақстандағы алғашқы университет атанған. Бүгін 2024 жылдың 26 қаңтарында Академиялық Адалдық Лигасы да Халықаралық Академиялық Адалдық орталығына (ICAI) қосылды.
«Бұл келісім Қазақстан Республикасының академиялық қауымдастығы үшін аса маңызды. Аталған келісім білім беру стандарттарын жақсартуға, университеттердің маңызды нәтижелерге қол жеткізуіне қолдау көрсетіп, жаңа көкжиектерді ашады», деді ҚР Академиялық Адалдық Лигасының жобалық кеңсесінің басшысы Нұргүл Маханбаева.
Академиялық Адалдық Лигасының жобалық кеңсесі Лига мүшелерін және ҚР жоғары оқу орындарын академиялық адалдықты қолдау үшін ICAI қатарына қосылуға шақырады.
ICAI-ге мүше бола отырып, ЖОО-ы озық зерттеу әдістемелеріне қол жеткізіп, әлемдегі университеттермен тәжірибе алмасып, академиялық адалдықты дамыту үшін қосымша білім беру ресурстарымен қамтамасыз етіледі. Сонымен қатар ICAI-ға мүше университеттер халықаралық серіктестіктерге, студенттер алмасуға және бірлескен ғылыми жобалар жасауға мүмкіндік алады. Сондай-ақ ICAI аймақтардағы университеттер арасында білім алмасуға ықпал ететін Networking Consortia ұсынады.
Қазақстандағы жоғары оқу орындары ICAI-ге қосылса, онда олар бірлесіп ICAI Central ASIA CONSORTIUM құра алады. Нәтижесінде еліміздің ЖОО-ында білім стандарттары артып, тәжірибе алмасу үшін бірегей кеңістік қалыптастыру мүмкіндігі артады.
