Әуелі Көкшенің көркем бейнесін кестелейтін «Көкшетау» поэзиялық композициясы көрермен назарына ұсынылды. Көз жауын алатын жақұттай жарқыраған сұлулық, киелі табиғаттың қастерлі бейнесі көрермен көңілін жаулап, көкірегіндегі мақтаныш сезімін оятты. Іле Дина Орманшина жетекшілік ететін «Асыл мұра» халықтық би ансамблі көркемдеген Сәкен Сейфуллиннің «Арқаның кербез сұлу Көкшетауы» орындалды. Ән жауһары жер шоқтығы Көкшетаудың бар қасиетін бейнелеп, көрікті етіп жеткізді. Әлдилеген әуені қандай. Ілкідегі талассыз дарындардың лайықты ізбасары, көкшелік композитор Иран сал Тасқараның «Көкшетау вальсін» тыңдарман қауым сүйсіне тыңдады. ҚР еңбек сіңірген әртісі Бисара Мәскенова, ҚР мәдениет саласының үздігі, дәстүрлі әнші Кенжебай Мұқышев, халықаралық, республикалық байқаулардың лауреаттары Азамат Қабдыл мен Әділ Құсайыновтар Үкілі Ыбырай мен Ақан серінің әндерін тамылжыта орындады.
Кеш барысында бүгінгі өнерпаздардың да шығармалары орындалып, тұсауы кесілді. Мәселен, «Сал Көкше» әні. Әннің сөзін белгілі ақын Қуаныш Оспан жазса, әнін Марғұлан Оспанов шығарған. Сондай-ақ Қаратай Бәйкеновтің сөзіне жазылған Есімжан Жапаровтың «Көкшем менің» әні де көпшілік көңілінен шықты. Белгілі ақын Төлеген Қажыбаевтың сөзіне жазылған композитор Құрмет Сақайдың «Көкшетау вальсі» шұрайлы шығармалардың бірі болды.
Бұл ежелден ән әуелеп, өлең қонған өлкеде туған жердің мәртебесін биіктетіп, қадір-қасиетін кейінгі ұрпақтың көкірегіне құйып, сүйегіне сіңіретін әдемі кеш болды.
Көкшетау қаласы
