Фото: Ашық дереккөз
«Қала тұрғындары онлайн рәсімдеген құжаттарын алысқа бармай, қала орталығынан алу үшін арнайы сектор аштық. Мұнда көлік құралдарына қатысты онлайн рәсімделген құжаттардың дайын нұсқасын алады. Осылайша, көлік иелері уақытын үнемдейді. Қала тұрғындары мұның ыңғайлы екендігін сезіне бастады. Бір ай ішінде мұнда 2 мыңға жуық (1787 құжат. Оның 771-і көлік құралын мемлекеттік тіркеу бойынша, 1016-сы жүргізуші куәліктері) автокөлік иелері өз құжаттарын алды», дейді «Азаматтарға арналған үкімет» мемлекеттік корпорациясы Алматы қаласы филиалы директорының орынбасары Айнаш Әубәкірова.
Дайын құжаттарды беру секторы дүйсенбі мен жұма аралығында таңғы 9:00-ден 18:00-ге дейін үзіліссіз жұмыс істейді. Алматы филиалының автокөлік иелеріне жасаған жағдайлары тек бұл ғана емес. «AllurAuto», «Хюндай», «Mycar», «Aster auto», «Chanqan» сияқты 9 автосалонда АвтоХҚО мамандары көлік құралдарын мемлекеттік тіркеу бойынша құжаттарды қабылдап отыр.
Қазіргі таңда Алматы қаласында автокөлік иелеріне арналған 4 мамандандырылған ХҚО жұмыс істейді. Өткен жылы Алматы қаласының мамандандырылған халыққа қызмет көрсету бөлімдері арқылы 1,3 (1 280 252) миллионға жуық мемлекеттік қызмет көрсетілген.
