Фото: championat.com
Осыған дейін 17 кездесудің барлығында жеңіске жетіп, 12 қарсыласын есінен тандырған 28 жастағы қандасымыз үшін бұл әлемдегі ең белді промоушендегі екінші жекпе-жегі еді. Былтыр қараша айында Азат UFC-дегі тұсаукесер кезесуінде америкалық Тайсон Нэмді ұпай санымен ұтты.
Кешегі жарыста Мақсұмның даярлығы нашар екені бірден байқалды. Бірінші кезеңде оның басымдау болғаны рас. Бірақ одан кейін қаша жүріп шайқасқан Джонсон қандасымыздың бірде-бір ауыр соққысын өзіне дарытпады. Азат қанша талпынғанымен, ештеңе өндіре алған жоқ. Керісінше, екінші кезеңде АҚШ өкілінің бәсекені мерзімінен бұрын аяқтауға мүмкіндігі болды. Ол Мақсұмды жығып алды да, «қылқындыру» тәсілін жасауға тырысты. Бірақ бұл қауіптен қазақ оңай құтылды. Бәсеке аяқталған бетте барлық үш төреші 29:28 есебімен жеңісті Чарльз Джонсонға берді. Сөйтіп, Азат Мақсұм өзінің спорттық мансабында алғаш рет жеңіліс тапты.
