Автобустарды отынмен қамтамасыз ету үшін технопарк аумағында орналасқан алғашқы метан газ стансасы жұмыс істейді. Сонымен қатар паркте маршруттарды бақылауға және автобустардың ішкі бейнежазбаларын көруге мүмкіндік беретін диспетчерлік бөлме бар. Автобустарды сатып алу және метан құю стансасын іске қосу облыстық және қалалық әкімдіктердің қолдауымен «Каспий» ӘКК» инвестициялық жобасы шеңберінде іске асырылды.
Жобаның мақсаты – Маңғыстау облысы жолаушылар тасымалын барынша қауіпсіз, ыңғайлы, сапалы ететін қоғамдық көлікпен қамтамасыз ету. Сондай-ақ нарыққа жаңа заманауи автобустар шығару.
– Мемлекет басшысы Қасым-Жомарт Тоқаевтың Маңғыстау облысын әлеуметтік-экономикалық дамыту бойынша берген стратегиялық тапсырмаларын орындау шеңберінде облыс пен аудан орталықтарын байланыстыратын автобус тасымалын ұйымдастыру жүзеге асырылып жатыр. Бүгін облысымыз үшін тарихи күн. Себебі шалғай аудандарымыздың тұрғындары енді облыс орталығына жаңа, заманауи, ыңғайлы, үлкен кластағы туристік автобустармен қатынайтын болады. Бұл экологиялық және экономикалық тұрғыда тиімді болмақ. Айта кету керек, автобус паркін жаңарту үдерісі кезең-кезеңімен жүзеге асырылып келеді. Алдымен 120 автобус сатып алынды, олардың 70-і қалаішілік көлік қызметін көрсетуге арналса, қалған 50-і облыс орталығы мен Мұнайлы ауданы арасында ыңғайлы тасымалдауды қамтамасыз етеді. Бұдан басқа 2024 жылы қосымша 100 заманауи автобус сатып алу жоспарланған. Бұл өңірдің көлік инфрақұрылымын жетілдіруге және кеңейтуге ықпал жасайды, – деді көліктер таныстырылымында Маңғыстау облысының әкімі Нұрлан Ноғаев.
Жол жүру құны да қолжетімді. Шамамен 300 теңге мен 2 000 теңге аралығында болады. Мысалы, облыс орталығы Ақтау қаласынан 70 шақырым жерде орналасқан Құрық ауылына дейінгі жол жүру құны бір адамға – 300 теңгені, ал такси құны бір адамға орташа есеппен 1 300 теңгені құрайды.
Маңғыстау облысы
