«Жалпы, өткен жылы экономикамыз 5,1 пайызға өсті. Ең бастысы, еліміздің даму қарқыны бәсеңдеген жоқ. Алдыңғы Үкімет осы бағытта біраз жұмыс істеді. Кеше мен бұрынғы Премьер-министр Әлихан Смайыловқа алғысымды білдірдім. Бірақ қазір жайбарақат отыруға болмайды, себебі алдымызда ауқымды жұмыс тұр. Сондықтан Үкіметтің жұмысына жаңа серпін беру қажет», деді Президент.
Смайылов Үкіметінің қаншалықты тиімді болғанына тарих өз бағасын береді. Енді келген Үкіметтің алдында қандай міндеттер тұр? Президенттің қойған межесі бойынша, алдымызда 2029 жылға қарай экономикамыздың көлемін 450 млрд долларға жеткізу, ішкі жалпы өнімнің жыл сайынғы өсімін кемінде 6 пайызға өсіру міндеті тұр. Былтыр 5 пайыздан асты. Сондай-ақ макроэкономикалық көрсеткіштермен қатар, халықтың нақты табысы да қарқынды түрде артуы керек.
Табыс атаулы табыс және нақты табыс болып бөлінеді. Атаулы табыстың өскенінен халықтың жағдайы жақсармайды. Өткен жылы сіз табысыңызға қанша тауарлар мен қызметтерді пайдалана алатын едіңіз, биыл сол тауарлар мен қызметтердің көлемі өсіп жатыр ма? Өспеген күннің өзінде, ең болмаса, сақталып қалды ма? Әлде кері кетіп жатыр ма? Осы сұрақтар маңызды.
Жаңа Үкіметтің экономикалық бағдарламасы халықтың әл-ауқатын жақсарту деген сөздермен басталып, нақты істерге ұласуы қажет. Сөз бен сандарды әдемі қылып көрсететін Үкімет бізге қажет емес, нақты іспен жұмыс көрсететін Үкімет қажет.
Яғни бюрократияны тоқтату, нақты нәтижеге қол жеткізу керек. Үкімет пен әкімдер жұмыс істеу тәсілін түбегейлі өзгертуге тиіс. Халықпен коммуникациялық байланыс жоғары дәрежеде жүргізілгені жөн. Мәселені жедел шешумен қатар, экономиканың ұзақмерзімді дамуын қамтамасыз ету өте маңызды.
Сонымен қатар Үкімет отырысында айтылған аграрлық-кредиттік корпорацияның әлеуетін күшейту және оған ауыл шаруашылығын субсидиялау жөніндегі әкімдіктердің функцияларын беру қажеттігі – орынды идея. Ол үшін бір цифрлық платформа аясында АӨК субъектілерін жеңілдетілген кредиттеу және субсидиялау қызметтерін біріктіру қажет.
Мақсат Халық,
экономист
