- Швейцарияда шпагамен семсерлесуден жасөспірімдер арасындағы Әлем кубогі аяқталды. Бұл жарыста Қазақстан құрамасы Польша, Швейцария және АҚШ спортшыларын ұтып, ақтық сынға дейін алқынбай жетті. Финалда жерлестеріміз әйгілі Мажарстан құрамасына есе жіберіп, күміс медальді олжалады. Біздің команданың сапында Богдан Лукин, Алексей Касаткин және Кирилл Проходов сынды сайыпқырандар өнер көрсетті.
- Біріккен Араб Әмірліктерінің (БАӘ) Фуджейра қаласында таеквондодан G2 санатындағы халықаралық турнир аяқталды. Парсы шығанағына аттанған отандық татами шеберлеріміз елге олжалы оралды. Атап айтсақ, Аманбол Бегімбетов (63 кг), Ясмина Нарбаева (62 кг) және Жансель Дениз (73 кг) финалда ғана ұтылып, күміс медальді мойнына ілді. Ал жартылай финалда сүрінген Батырхан Төлеуғали (80 кг), Бексұлтан Мұсахан (68 кг), Ерасыл Орынбасар (74 кг) және Нұрлан Мырзабаев (87 кг) қолаға қол созды.
- Халықаралық футбол федерациясы (ФИФА) 2026 жылы АҚШ, Канада және Мексикада жалауы желбірейтін әлем чемпионатының негізгі ойындары қай жерлерде өтетінін жария етті. Бас жүлде үшін тартыс АҚШ-тың Нью-Джерси штатына қарасты Ист-Ратерфорд қаласындағы «МетЛайф-Стэдиумде» ұйымдастырылады. Бұл стадион 82,2 мың көрерменге есептелген. Қола медаль үшін тартысты Флорида штатына қарасты Майами қаласындағы «Хард Рок Стэдиум» қабылдайды. Аталған спорттық нысан 65 326 адамды сыйдыра алады.
- Қатардың бас шаһары Дохада су спортынан әлем чемпионаты өтіп жатқаны белгілі. Күні кеше ғана әртістік жүзуден құрамында Наргиза Болатова мен Эдуард Ким сынды дүлдүлдері бар Қазақстан құрамасы аралас жұптар сайысында тарихи алтынға қол жеткізгені туралы жазған едік. Ендігі үміт – жүзушілерде. 11 ақпанда басталатын жарыста Әділбек Мусин, Егор Попов, Максим Сказобцов, Арсен Қожахметов, Аделаида Пчелинцева, Ксения Игнатова, София Сподаренко және Диана Тасжанова өнер көрсетеді. Сол бәсекеде тағы бір жүлде алуды жоспарлап отырмыз. Осы орайда Әділбек Мусин мен Аделаида Пчелинцеваға айрықша сенім артылып отыр.
- 18 ақпанда Мәскеудегі «ВТБ Аренада» баскетболдан ВТБ Бірыңғай лигасының «Жұлдыздар матчы» өтеді. Аталған жарысқа барлығы 24 ойыншы қатысады. Солардың арасында «Астананың» намысын қорғап жүрген америкалық легионер Ройс Хэмм де бар. Шабуыл шебінде өнер көрсететін баскетболшының жасы – 24-те, бойы – 202 сантиметр, салмағы – 102 кг.
- Таяуда АҚШ-тың Лас-Вегас қаласында аралас жекпе-жектен өткен UFC турнирінде күш сынасып, жергілікті файтер Чарльз Джонсоннан жеңілгеніне қарамастан қазақ спортшысы Азат Мақсұм 66 мың доллар көлемінде табыс тапты. Оның 12 мыңын жекпе-жекке шыққаны және 50 мыңын осы айқас ең үздік деп танылғаны үшін алды. Тағы 4 мыңы – демеушілер тарапынан берілген бонус. Ал Джонсон 78 мың доллар шамасында олжаға кенелді.
- Кәсіпқой рингте 16 кездесу өткізіп, барлығында жеңіске жетіп, 11 қарсыласын нокаутқа жіберген 28 жастағы америкалық Остин Уильямс орта салмақта WBO мен IBF нұсқалары бойынша әлем чемпионы атанып отырған Жәнібек Әлімханұлын жекпе-жекке шақырды. 30 жастағы қазақтың ұлы да жеңілістің кермек дәмін татқан емес. Ол 15 бәсекенің 10-ын мерзімінен бұрын аяқтады. Уильямс өзінің соңғы кездесуін 4 ақпанда Лас-Вегаста Германияның өкілі Армель Мбумба-Яссаға (10-1, 7 КО) қарсы өткізіп, оны алтыншы раундта ұрып жықты.
