Алғашқы болып жасөспірімдердің Дүниежүзілік Олимпиадасының күміс жүлдегері Талғат Шәйкен жарыс жолынан шығып қалды. 71 кг салмақта қолғап түйістірген ол ара-тұра кәсіпқой бокста да күш сынасып жүр. Бұл ретте қандасымыздың көрсеткіші мінсіз: 9 жекпе-жек, 9 жеңіс, 5 нокаут. Бірақ кәсіпқой мен әуесқой рингтің арасы жер мен көктей, екеуі мүлде бөлек спорт түрлері деп мамандар бекер айтпайды ғой. Талғат өзінің екінші кездесуінде грузиялық Әскерхан Мадиевке жол берді.
Тағы алты жерлесіміз ширек финалда жеңіліс тапты. Ең өкініштісі, солардың үшеуі бітіспес қарсыласымыз өзбектерден ұтылды. Атап айтсақ, Руслан Күзеубаев (60 кг) әлем мен Азия чемпионы, Азия ойындарының жеңімпазы Әбдімәлік Халоковқа, Ерасыл Таңкай (63,5 кг) Адхамжон Мұхиддиновке және Нұрқанат Райыс (75 кг) Фазлиддин Эркинбоевқа есе жіберді. Дәулет Молдашев (54 кг) әлем чемпионатының екі дүркін қола жүлдегері, Еуропа ойындарының жеңімпазы, франциялық Биллал Беннамаға жарытып қарсылық көрсете алған жоқ. Былтыр дәл осы турнирдің финалында айқасып, күміс медальды мойнында жарқыратқан Оразбек Асылқұловты (57 кг) бұл жолы моңғолиялық Енх-Ама Харкуу сүріндірді. Ал үндістандық Навин Құмар тәжірибелі Абзал Құттыбековке (92 кг) тізе бүктірді.
Жартылай финалға үш жерлесіміз ғана жетті. Олар – Санжар Тәшкенбай, Дулат Бекбауов және Тұрсынбай Құлахмет. Бастапқы бәсекелерде болгариялық Николай Дишков, өзбек Алахон Абдоллаев және украиналық Матвей Ражбаға сан соқтырған 80 кг салмақ дәрежесіндегі Тұрсынбай бұл межеде Қытайда туып-өскен қандасымыз Тоқтарбек Таңатқанның осал тұсын таппады. Нәтижесінде, Құлахмет қола медальды қанағат тұтты. Тоқтарбек – финалда.
Бас жүлде үшін тартыста 51 кг салмақтағы Санжар Тәшкенбай финалда әлем чемпионатының финалисі, Азия ойындары мен чемпионатының жеңімпазы, үнділік Амит Пангалмен айқасты. Бұл жекпе-жек Пангалдың пайдасына шешіліп, Санжар күміс жүлдені қанағат тұтты. Әлем және құрлық чемпионы деген атағы бар 21 жастағы қазақ боксшысы оған дейін қырғыз Бекзат Ергешев, моңғол Ган-Эрден Ганхуяг және өзбек Асылбек Жалиловты жеңген еді.
Бастапқы кезеңдерде күмәнсіз жеңіске жеткен 67 кг салмақтағы Дулат Бекбауов жартылай финалда алжирлық Әбденасер Бенлаибиден басым түсіп, шешуші тұста Үндістанның тағы бір өкілі Раджатпен күш сынасты. Бұл бәсекеде әлем чемпионатының күміс жүлдегері өзінің мықтылығын мойындатып, бас жүлдені қанжығасына байлады. Сондай-ақ Қытайдың туы астында өнер көрсеткен Тоқтарбек Таңатқан да жеңіс тұғырының ең биік сатысына көтерілді. Қандасымыз финалда ринг қожайыны Кристиян Николовты қапы қалдырды. Бұл – Қытай елі былғары қолғап шеберлерінің осы жарыстағы жалғыз жүлдесі.
Сөйтіп, қоржынында бір-бірден алтын, күміс және қоласы бар Қазақстан құрамасы жалпы есепте бесінші орынға табан тіреді. Алдымызда – Өзбекстан (5+2+5), Үндістан (2+2+2), Болгария (1+4+0) және Украинаның (1+1+3) боксшылары.
