- Шайбалы хоккейден Қазақстанның жастар құрамасы (U-20) Минскіде өткен «Болашақ кубогінде» сүреңсіз өнер көрсетті. Алғашқы матчта олар Беларусь құрамасынан (U-20) 2:5 есебімен есе жіберсе, іле-шала Ресейден (U-18) ойсырай ұтылды – 1:8. Соңғы кездесуді Сергей Старыгиннің шәкірттері ресейлік жасөспірімдермен (U-17) шеберлік байқасты. Бұл бәсекеде де жерлестеріміз жеңіліс тапты – 4:7.
- Дохада өтіп жатқан су спорты түрлерінен әлем біріншілігінде Қазақстан құрамасы әртістік жүзуден Олимпия ойындарының лицензиясын иеленді. Сонымен қатар былтыр Азия ойындарында қола медаль алған Ясмина Тұяқова мен Арина Пушкина жұбы да Париждегі дүбірлі додада өнер көрсету құрметіне ие болды.
- 2023 жылы қаржылай тұрғыдан мол олжаға кенелген спортшылардың рейтингі жарияланды. АҚШ-тың «Sportico» журналының мәліметінше, былтыр ең көп табыс тапқан саңлақ – «Әл-Насрдың» шабуылшысы Криштиану Роналду. Португалиялық жұлдыздың есепшотына 275 млн доллар аударылған. Сондай-ақ ең бақуатты бестіктің қатарында америкалық гольфшы Джон Рам (203 млн), Аргентинаның әйгілі аяқдоп шебері Лионель Месси (130 млн), АҚШ баскетболшысы Леброн Джеймс (125,7 млн) және Францияның футболшысы Килиан Мбаппе (125 млн) бар.
- UFC-де күш сынасып жүрген Мақсат Қайсар (9-3) 27 сәуірде Лас-Вегаста Аншул Джублимен (7-1) жұдырықтасуға тиіс еді. Алайда Үндістанның өкілі жекпе-жекке шығудан бас тартты. Аталған ұйымның басшылары оны дереу 35 жастағы Мексиканың файтері Габриэл Бенитеспен (23-11) алмастырды. Енді Қытайда туып-өскен қандасымыз дәл сол күні ардагер спортшымен айқасады.
- Таяу Шығыста орналасқан бірқатар мемлекет ФИФА-дан Газа секторында әскери операция жүргізіп, бейбіт тұрғындарды қынадай қырғаны Израильді халықаралық додалардан шеттетуді өтініп жатыр. Сондай талап қойғандар қатарында Сауд Арабиясы мен БАӘ бастаған 12 ел бар. Олар аталған ұйымның мүшелігіндегі барлық 211 ұлттық және алты аймақтық футбол федерацияларынан қолдау сұрап, осы мәтінде арнайы хат жолдады.
- Екінші орта салмақтағы абсолютті әлем чемпионы Сауль «Канело» Альварес 2023 жылдың қорытындысы бойынша ең көп табыс тапқан кәсіпқой боксшылардың көшін бастады. Мексикалық марғасқаның есепшотына былтыр 66 млн доллар аударылды. Барлық спортшының қоса есептегенде, мол олжаға кенелгендер тізімінде «Канелоға» 17-орын бұйырды. Сондай-ақ ТОП-5 былғары қолғап шеберлері қатарына Энтони Джошуа (55 млн), Джейк Пол (47 млн), Джервонта Дэвис (42,5 млн) және Райан Гарсия (40,5 млн) енді.
