Мұны біз өзге де әкімдерге үлгі болсын деген ниетте жазып отырмыз. Естеріңізде болса, Ел Президенті Қасым-Жомарт Тоқаев «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында «Халық үніне құлақ асатын мемлекет» тұжырымдамасын бекіткен еді. Яғни мемлекеттік қызметкер халықтың тілек-арызын жерге тастамай, мәселесін шешуге ұмтылуы шарт. Соған орай қала басшысы қызметтік көлігінсіз, жалғыз өзі ел ішін қоғамдық көлікпен аралап, тұрғындармен тілдесті.
Қала әкімін бірден таныған жұртшылық оның бұл бастамасын қолдап, халықпен бірге қоғамдық көлікпен жүріп қала ішін аралап жүрген ең алғашқы әкім екендігін айтты.
«Әкімнің автобусқа отырғаны жақсы болды. Кейбір автобустарды ұзақ күтеміз, қала сыртындағы саяжайларға баратын қоғамдық көліктер өте аз. Одан кейін қаланың ішкі жолы өте нашар. Орталық базарда адам жүретін жолдарға тұрғындар көліктерін қойып тастайды. Осы мәселелерді қарауыңызға алсаңыз», деді қала тұрғыны Гүлдария Әнуарбек.
Әдеттегідей қала әкімі тұрғындардың жеке мәселелерін кабинетте емес, тұрғындарға толы автобуста тыңдап, кей мәселені жеке бақылауына алатындығын жеткізді.
«Кейінгі уақытта қоғамдық көлікте болатын келеңсіз жайт жиілеп кеткенін әлеуметтік желіден байқап отырмын. Осы мәселеге қатысты халықтың пікірін тыңдап, тұрақты түрде қаланы қоғамдық көлікпен араламақпын. Жұртшылықтың мәселесін жіті көруге мүмкіндік береді екен», деді Е.Бәзіл.
Сонымен қатар қала басшысы коммуналдық базармен орталықта жайғасқан сауда нысандарын да аралады. Алдағы уақытта бұл үрдіс әдетке айналмақ. Тұрғындармен тығыз қарым-қатынас орнату үшін және қаланың ішкі мәселесімен жіті танысу үшін өзге де автобустармен облыс орталығын аралайды.
Жетісу облысы
