![Екі жасар баланы аман алып қалды](/media/2024/02/20/zhedel-dgardem.webp)
Үй мен жұмыс арасындағы қарбалас уақытта жедел жәрдем бригадасы тұншығып жатқан баланы балалар ауруханасына алып бара жатады. Сәбидің жағдайы тіпті нашарлай бастағанда дәрігерлер уақытты босқа өткізбей, жақын жердегі Қазыбек би көшесіндегі Қалалық жедел шұғыл көмек көрсету ауруханасына (ҚЖШКА) апаруды ұйғарады.
Бала бірден осы аурухананың жансақтау бөліміне жатқызылып, реаниматологтер Геймлих айласын қолданып, іштегі бөтен затты алып тастауға бірнеше рет әрекеттенгенімен, өкінішке қарай, нәтиже болмаған. ҚЖШКА директорының орынбасары Ермек Желдібаевтың айтуынша, ұжым кішкентай науқастың өмірін сақтауда тығырыққа тірелген. Ересектер ауруханасында балаларға арналған бронхоскоптың болмауына байланысты оған бронхоскопия жасау мүмкін емес еді. Алайда баланың жағдайы нашарлап, сатурациясы төмендеп, көгере бастаған соң реаниматологтер Нұрлан Рсалиев, Мамыржан Юлдашев және хирург Бақтияр Галиев шұғыл түрде интубация жасады. Интубация кезінде баланың тыныс жолдары ашылып, осыдан кейін ғана балалар ауруханасынан дәрігерлер жеткенше оның жағдайын тұрақтандыруға мүмкіндік туды.
Балаларға шұғыл медициналық көмек көрсету орталығының (БШМКО) мамандары келгеннен кейін бронхоскопияның көмегімен баланың тыныс жолына тұрып қалған бұршақ алынды. Кішкентай ғана пациенттің жағдайы ҚЖШКА жансақтау бөлімінде бірнеше сағаттан соң қалпына келе бастағаннан кейін, одан әрі қарай емдеу үшін аталған орталыққа жеткізілді.
«Бұршақты шығарып алу оңай емес, бұл негізінен бронхоскопия көмегімен жасалады. Балалар ауруханасының мамандары келгенге дейін біздің дәрігерлер дер кезінде әрекет жасады. Содан кейін БШМКО дәрігерлері «ересектер» ауруханасы жағдайында кәсіби түрде жасаған бронхоскопияның арқасында бала аман қалды. Бәріміз сәбиге алаңдап, оның жағдайын жіті қадағалап отырдық, қазір үйге шығарылғанын естіп қуанып жатырмыз», дейді дәрігер Ермек Желдібаев.
Балалар ауруханасы қабылдау бөлімінің меңгерушісі Мейіржан Құрманалиев мұндай ересектер мен балалар ауруханалары мамандары шұғыл түрде науқасты қосыла құтқаратын оқиғалар жылына екі-үш рет қайталанатынын айтады.
«БШМКО қабылдау бөліміне 103-тен «Науқас 2 жаста, аспирациялық синдром, реанимациялық бригаданы дайындаңыз» деген қоңырау түсті. Қабылдау бөлімінде 7 маманнан тұратын бригада күтіп отырған. Шамамен 30 минут өтті, бала әлі жоқ: «Бізге жеткізуге уақыты болмады ма?», «Бала аман ба?» деген үрей туып, 103-ке өзіміз қоңырау шалдық. Сөйтсек, олар науқасты жақын маңдағы басқа ауруханаға апаруды ұйғарған екен. Уақыт өтіп жатты. Команда тез жиналып, 15 минут ішінде ҚЖШКА-ға жетті. Келгеннен кейін біздің топ бронхоскопия жасап, тыныс алу жолдарынан бұршақты шығарып тастады. Екі аурухананың жедел әрекетінің арқасында сәби аман қалды», дейді М.Құрманалиев.
Балалар ауруханасының дәрігерлері биыл бір жарым айдың ішінде тыныс жолдарында бөгде зат бар 10 науқасты аман алып қалғанын айта кеткен жөн. Бұл пациенттердің барлығы – 1 мен 3 жас аралығындағы балалар.
АЛМАТЫ