Коллажды жасаған – Қонысбай ШЕЖІМБАЙ, «EQ»
Қарағанды облысында әлеуметтік маңызы бар азық-түлік тауарларының бағасын тұрақты ұстап тұру үшін нендей шаралар қолға алынып жатқаны жайында Өңірлік коммуникациялар қызметі платформасында өткен брифингте Кәсіпкерлік басқармасының басшысы Ирина Любарская және ауыл шаруашылығы басқармасы басшысының орынбасары Сырым Бошпанов айтып берген еді.
Өңірде бағаны реттеу мақсатында бірнеше тетік қолданылады: өңірлік тұрақтандыру қоры құрылады, өндірушілерге айналым схемасы бойынша несиелер беріледі, меморандумдар жасалады.
– «Сарыарқа» ӘКК бағасын тұрақтандыру үшін 2 219 тонна бакалея өнімі, оның ішінде 404 тонна күріш, 422 тонна қант, 73 тонна қарақұмық жармасы, 90 мың литр күнбағыс майы, 1 230 тонна бірінші сұрыпты ұн жеткізу туралы келісімшарт жасалды. Сондай-ақ 690 тонна картоп, 274 тонна сәбіз, 520 тонна пияз және 222 тонна қырыққабат үшін несие шарттары жасалды, – деді С.Бошпанов.
Айналым схемасы шеңберінде әлеуметтік нан 90 теңгеден, бірінші сұрыпты ұн – 154 тг/кг және макарон – 245 тг/кг сатылады. «Құрма» агрофирмасы» құс фабрикасы дүкендерге он дана жұмыртқаны 480 теңгеден жеткізеді.
Кәсіпкерлік басқармасы күнделікті негізде біздің облыста өндірілмейтін әлеуметтік маңызы бар өнімдердің болуы мен бағасына мониторинг жүргізеді. Бұл – 19 атаудың бесеуі – қант, тұз, қарақұмық жармасы, ұнтақталған күріш, өсімдік майы.
Қалалар мен аудандардың әкімдіктері сауда ұйымдарымен әлеуметтік маңызы бар азық-түлік өнімдеріне ең төменгі сауда үстемесі – 5-10% болатыны туралы 2832 меморандумға қол қойды.
– 400-ден аса әлеуметтік бұрыштар мен сөрелер құрылды, онда бұл өнімдер ең төменгі бағамен ұсынылған. 20-дан аса әлеуметтік павильондар жұмысын жалғастырып жатыр. Жыл басынан бері 50-ден астам жаңа сауда нысандары іске қосылды, олармен бірден ӘМАТ-қа ең төменгі үстемеақы туралы меморандумдар жасалады, – деді И.Любарская.
