Фото: ҰОК
Ширек финалда Елдос Сметов грузиялық Георгий Сардалашвилиге ескерту саны бойынша есе жіберді. Соңыра жұбаныш белдесуіне де жіберілмейтіні белгілі болды. Бас бапкер Нұрбол Сүлейменов оның турнирден шеттетілуіне тыйым салынған әдісті қолданғаны себеп болғанын айтты.
«Елдос Сметов ширек финалда қарсыласының мойнын бұрап жіберді. Бұл әдіске дзюдода тыйым салынған, себебі, спортшының денсаулығына қауіп төндіреді. Сондықтан, төреші Сметовке «хансоку-маке» берді. Бұл ескертуден кейін спортшы жарысты жалғастыра алмайды. Елдостың жұбаныш белдесуіне қатыспау себебі осы. Жалпы, Елдостың дайындығы жаман емес. Жарақатының да беті бері қарап қалды. Ташкент турнирін жетінші орынмен аяқтап отыр», деді Нұрбол Сүлейменов.
