Іс-шараға Алматы қаласы әкімінің орынбасары Арман Қырықбаев, Мәдениет және ақпарат министрлігі Жастар және отбасы істері комитетінің төрағасы Қайрат Қамбаров, Жастар саясаты басқармаларының басшылары, Жастар ресурстық орталықтарының жетекшілері және мегаполистің белсенді жастары қатысты.
Алматы әкімінің орынбасары әкімдіктің жастарға арналған әлеуметтік инфрақұрылым құрудағы басым бағыттары мен жұмыс жоспары туралы айтып берді.
– Алматы тұрғындарының шамамен үштен бірі немесе 682 мыңы 14 пен 35 жас аралығындағы жастар. Бұл өз кезегінде бізден жастарды қаламыздың дамуы үшін атқарылып жатқан жұмыстарға белсенді тартуды, олардың жайлы өмір сүруі, жұмыс істеуі, бос уақытын тиімді өткізуі үшін қолайлы жағдай жасауды талап етеді. Осы орайда қаламыздың барлық ауданында NEET жастарды қолдау үшін 8 комьюнити орталық аштық, – деді Арман Қырықбаев.
Ел жастарының басым бөлігі шоғырланған мегаполисте жастарды қолдауға арналған ауқымды жобалар аз емес. Биылдан бастап қаланың әр ауданында осы санаттағы азаматтарды қолдауға арналған комьюнити орталықтар өз жұмысын бастаған болатын. Алматы қаласы Жастар саясаты басқармасының басшысы Қайыржан Мендіғалиев аймақтардан келген қонақтарға ел аумағында алғаш қанат қаққан жобаның жұмысы туралы баяндады.
– Әрбір комьюнити орталық креативті қоғамдық кеңістікті құрайды. Мұнда жастарды қолдау үшін қажеттінің бәрі бір жерде жинақталған. Бұл – әртүрлі мемлекеттік бағдарлама бойынша кеңес беру, психологиялық және заңгерлік көмек, NEET жастарын қысқамерзімді курстар арқылы өзекті мамандықтарға оқыту және жұмысқа орналастыру. Жастар үшін ақысыз негізде білім беру курсы мен біліктілікті арттыру курстарын өткізуге, жастар бағдарламасын қазіргі заманға бейімдеуге әр кез дайынбыз, – деп атап өтті Қ.Мендіғалиев.
Жоғарыда айтып өткендей, Алматыны дамыту бағдарламасы аясында 2025 жылға дейін қала аумағында 16 жастар комьюнити орталығын іске қосу жоспарланған. Жастарға қолдау көрсететін мұндай алаңдар құру – әлемдік тәжірибеде жемісін берген жоба. Комьюнити орталықтар еңбек нарығы үшін сұранысқа ие мамандарды даярлауға және жастарды мегаполистің қоғамдық бастамаларына тартуға мүмкіндік бермек.
«Жастарға қолдау көрсететін, қажеттінің барлығын бір жерде жинақтаған комьюнити орталықтарды көріп қуанып отырмын. Мұнда жастарды қолдауға барлық жағдай жасалып, ең бастысы, қызмет түрлерін тегін алуға болатыны қуантты. Мұндай форматтағы орталықтар тек Алматыда емес, еліміздің барлық қаласында болуы қажет», дейді Жастар және отбасы істері комитетінің төрағасы Қайрат Қамбаров.
Жетекші мамандар технократия дәуірінің жастарын қандай мәселелер алаңдататынын, оларды қоғамдық құндылықтарға баулудың мән-маңызын, түрлі теріс бағытқа бой алдырғандарды жаңсақ ойдың шырмауынан шығарудың тетіктерін талқылады. Өзге өңірлерден келген мамандар бұл бағытта Алматының тәжірибесіне жүгінудің артықшылығы мол деп есептейді. Себебі Алматының әр ауданынан ашылған орталықтар жастардың қоғамнан өз орнын табуына оң ықпалын тигізеді.
АЛМАТЫ
