Салтанатты іс-шара қалалық жастар ресурстық орталығында өтті. Оған гарнизонның әскери бөлім командирлері, қорғаныс істері департаменттері мен оқу орындарының тәрбие және идеологиялық жұмыс жөніндегі орынбасарлары, сондай-ақ Қарулы күштердің ардагерлері қатысты.
Мерекелік жиында гарнизон басшысы, подполковник Айдос Исаев жиналған барша қауымды кәсіби мерекелерімен құттықтады. Ол бүгінде гарнизонның әскери ұжымдарының тәрбие және идеологиялық жұмысы ақпараттық-тәрбие, психологиялық, мәдени-демалыс, әскери-әлеуметтік, әскери тәртіп пен құқықтық тәртіпті нығайту, сондай-ақ жоғары моральдық-психологиялық ахуалды сақтау сияқты көптеген бағыттарда белсенді жұмыс атқарылып жатқанын мәлім етті.
– Тәрбие құрылымдары офицерлерінің жұмысы қажырлы және маңызды іс саналады. Олар әскери қызметшілермен тіл табыса білуі, оларды түсінуі және сенімді қарым-қатынас құрудың жолдарын таба білуі қажет. Жеке құрамның жоғары моральдық-психологиялық жай-күйін сақтау тікелей тәрбиешілерге байланысты, – деп атап өтті подполковник А.Исаев.
Тәрбие және идеологиялық жұмыс жөніндегі орынбасарлар институтының құрылу тарихы Қарулы күштердің қалыптасуымен тығыз байланысты. Қазақстан армиясының дамуы мен қалыптасуына қосқан зор үлесі үшін салтанатты жиын барысында ұрпақтар сабақтастығын көрсету мақсатында Қарулы күштердің ардагерлеріне құрмет көрсетілді.
– Запасқа кеткен әскери қызметшілердің көпшілігі бүгінде жас ұрпаққа патриоттық тәрбие беру ісіне жан-жақты жәрдем көрсетуді жалғастырып жатқанын түсіну қуантады. Әскери ұжымның қамқорлығы мен назарының арқасында біз, Қарулы күштердің ардагерлері, қоғамға, әсіресе, жастарымызға жинаған тәжірибемізді жеткізу үшін әлі де пайдалы екенімізді сезінеміз. Бұл ұрпақтар сабақтастығының басты мәні мен кілті, онсыз біз болашаққа жол ашпаймыз, – деп атап өтті запастағы полковник Рейімбай Халмұратов.
Үздік тәрбиешілер гарнизон басшысының атынан грамоталар және алғыс хаттармен марапатталды. Іс-шара қатысушылар мен қонақтарға қуаныш пен шаттық сыйлаған мерекелік концертпен аяқталды.
ШЫМКЕНТ
