Фото: видеодан скриншот
Ішкі істер министрлігінің ақпаратына сүйенсек, ұйымдасқан топ екі танысын күштеп көлікке отырғызып, пәтерде қару-жарақпен қорқытқан. Жәбірленушілердің 300 мың теңге ақшасы мен ұялы телефондарын тартып алған. Сонымен қатар тағы бір миллион теңге талап еткен.
Ұсталғандардың бірі қашпақ болып, бесінші қабаттан секіріп кеткен. Оның ауыр жарақат алғаны анықталды. Күдіктілер екінші жәбірленушіні көлікке отырғызып, ізін суытпақ болған кезде қолға түсті. Бұл факті бойынша Қылмыстық кодекстің бірнеше бабы негізінде іс қозғалды.
Сонымен қатар полиция қызметкерлері Оралда тонау, бопсалау, алаяқтықпен айналысқан колледж студенттерінен құралған қылмыстық топты ұстады.
Аталған факті бойынша сегіз қылмыстық іс тергеліп, күдіктілердің басқа қылмыстарға қатысы бар-жоғы анықталып жатыр.
«Барлық факті бойынша күдіктілер ұсталды. Тергеу мүддесіне сай өзге ақпарат жарияланбайды. Құрметті азаматтар, егер сіздер қылмыстық топтар тарапынан қол сұғушылыққа тап болсаңыздар, дереу полицияға хабарласыңыздар. Біз сіздің ақпаратыңыздың құпиялылығына кепілдік береміз және сізді қорғап, қауіпсіздігіңізді қамтамасыз етуге бар күш-жігерімізді саламыз», деді департамент бастығы, ІІМ ресми өкілі Шыңғыс Алекешев.
Айта кетейік, ІІМ жыл басынан бері 130-дан аса ұйымдасқан қылмыстық топтың әрекетін тоқтатты.
