Талғар ауданы Қызыл Қайрат ауылында мүгедек балаларды емдеуге арналған «Ақ жол-М» оңалту орталығының жаңа ғимараты пайдалануға берілді. Жаңа орталықтың ашылу салтанатына Алматы облысы әкімінің бірінші орынбасары Нұрлан Әбдірахым, «Қазақстан халқына» ҚҚ төрағасы Болат Жәмішев, «Нұр Мүбарак» университеті мен мешітінің бас имамы, «Ақ жол-М» қамқоршылық кеңесінің мүшесі Қайрат Жолдыбайұлы, меценаттар мен демеушілер, облыстық жұмыспен қамтуды үйлестіру және әлеуметтік бағдарламалар басқармасының, әлеуметтік қорғау саласын дамытудың ұлттық ғылыми орталығының, денсаулық сақтау басқармасының өкілдері мен ата-аналар қатысты.
«Жаңа орталықта 200-дей ерекше балаға арнаулы әлеуметтік қызметтер көрсетіледі. Қордың басшылығы меценаттардың қолдауымен бұрынғы ғимараттың жанына жертөлесі бар жаңа үш қабатты ғимарат салды. Ендігі жерде оңалту орталығы екі есе кеңейіп, яғни 400-ге жуық баланы қабылдау мүмкіндігіне ие. Қазіргі уақытта бұл орталық облыстық әкімдіктің мемлекеттік әлеуметтік тапсырысы шеңберінде мүгедектігі бар 58 балаға арнаулы әлеуметтік қызметтер көрсетіп жатыр. Болашақта мемлекеттік тапсырыс көлемін арттырып, көп баланы қамтуға мүмкіндік болады», деген Нұрлан Ерғалиұлы Мемлекет басшысының бастамасымен құрылған «Қазақстан халқына» қорының азаматтарға көмек көрсетудегі жұмыстарына алғысын білдірді.
Жаңа ғимаратты заманауи құрылғылармен жабдықтауды қор өз мойнына алған. Жалпы құны 950 млн теңгеге жуық қаржыға швейцариялық роботты оңалту кешені, кореялық жүруге үйрету кешені, ресейлік локомоторлы терапия жүйесі сынды 80-нен аса құрылғы алынып, тұзды шахта, сенсорлық бөлмелер және арнайы кабинеттер жабдықталған.
«Бұл «Қазақстан халқына» қорының қолдауымен өңірімізде іске асқан алғашқы жоба емес. Осыған дейін Алматы облысының онкологиялық орталығына компьютерлік томограф, маммограф және сараптамалық деңгейдегі ультрадыбыстық жүйесі бар жылжымалы медициналық кешендер табысталған болатын. Қазір олар ел игілігіне қызмет етіп жатыр», деді ол.
Атап айтсақ, қордың қолдауымен сирек аурулары бар 11 пациент 1,2 млрд теңгеден аса сомаға дәрі-дәрмекпен қамтамасыз етілген. Ұрықтың даму ақауларын ерте анықтау бойынша шетелде екі дәрігер оқытылса, мүйіз қабығын трансплантациялауды қажет ететін көзі науқас 9 пациентке 9,1 млн теңге сомасында қайырымдылық көмек көрсетілген.
Алдағы уақытта қормен бірлесіп денсаулық сақтау саласына қатысты тағы 3 жобаны іске асыру қарастырылып отыр. Атап айтқанда, Кеген ауданында 2 балаларды оңалту орталығын, «Кәусар» облыстық оңалту орталығын ашу және облыстық балалар клиникалық ауруханасын нейрохирургиялық жабдықтармен қамтамасыз ету жоспарланған.
Жаңа орталықта білікті дәрігерлер, нұсқаушылар, логопед, реабилитологтерден құралған 68 маманның көмегімен 200-ге жуық бала кешенді ем алады. Оған толық мүмкіндік бар. Оңалту шаралары күндізгі уақытта жүргізіледі. Аптасына бес күн жұмыс істейтін орталықтың бірегейлігі – әр балаға жеке мән беріліп, ата-анасының баласымен бірге болуына қолайлы жағдай жасалынған. Орталықтың ашылу барысында қайырымды азаматтар Neuro-MSX TMS (транскраниальды магниттік стимулятор), мұғалімдерге арналған жиһаздар, оттегі концентраттары мен заманауи компьютерлерді сыйға тартты.
Бұдан кейін «Қазақстан халқына» ҚҚ өкілдері Талғар қаласындағы С.Сейфуллин атындағы №2 орта мектепке барып, оқытудың жаңа инновациялық әдістерімен танысты.
Алматы облысы
