Бағдарлама біздегі «Альянс Банк» арқылы жүзеге асырылды. Сол жерде екі жыл жұмыс істегеннен кейін «Еуразиялық банктен» шақырту түсті. Ондағы қызметім шағын және орта бизнес қызметіне арналды. Сол жерде он жыл қызмет атқардым және банк ішіндегі барлық баспалдақты басып өттім. Жетекші маман, бас маман, бөлім басшысы, басқарма басшысының орынбасары, басқарма басшысы болып, басқарушы директор лауазымына дейін жеттім. Сол қызметті біраз уақыт атқарып, одан кейінгі жолымды қалай жалғастырамын деп отырғанда мені «Тұрғын үй құрылыс жинақ банкіне» шақырды. Қазіргі – «Отбасы банк». Басқарма төрайымының орынбасары болып сол жерде де ұзақ мерзім жұмыс істедім.
Табаным тиген қай ұйымның мен үшін маңызы биік. «Альянс Банк» пен «Еуразиялық банк» те шағын және орта бизнеске несие беру саласына жауапты болдым. Ол құрылымдарда азаматтардың несие алып, кәсіп бастауына, сөйтіп өзінің де, елдің де жағдайын жақсартуына барынша үлесімді қостым. Ал «Отбасы банкте» баспана алуға қатысты несиелер ғана беріледі ғой, мен осы ортаға келу арқылы адамға одан сайын жақындай түскендей болдым. Азаматтардың үй алуына себепші болу адамға ерекше бақыт сыйлайды. Одан кейін 2020 жылдың соңында аяғымның ауырлығына қарамастан, Үміт Шаяхметова ханым «Халык-Life» компаниясына шақырды. Миссиялық тұрғыдан қарайтын болсақ, мен адамға одан сайын жақындай түстім. Яғни бұл жерде адамдардың өмірін сақтандыруға белсене араласып келемін.
Қазір біздің компания азаматтар әр тиынның маңызын түсініп, артық ақшаны өмірін сақтандыруға, баласының біліміне жинаса деген ой аясында стратегия қалыптастырып отыр. Бұл орайда компания жұмысында ағартушылық сипат басым. Сақтандыру нарығын дамытуға Қаржы нарығын реттеу және дамыту агенттігі көп көмегін тигізіп жатыр. Соның арқасында елімізде алғаш рет өмірді сақтандыру нарығында мемлекеттік қордан сыйақы бөлінетін болды. «Білім-Life» сақтандыру бағдарламасы бойынша әке-шешесі ақша жинайды. Біз оған 8 пайыз төлемақы беріп отырамыз. Егер көпбалалы ата-ана болса, оған мемлекет 7 пайыз сыйлықақы береді. Биылдан бастап тура тұрғын үй құрылыс банкіндегідей сыйлықақы жүйесі өмірді сақтандыру жүйесіне де келді. Сонда әке-шешесі «жинағыма сақтандыру компаниясы 8 пайыз сыйлықақы береді, соның үстінен балам білімге қолжеткізсін деп мемлекет тағы 7 пайыз береді екен, онда ай сайын тым құрыса он мың теңге болса да салып отырайын» деп ойлана бастайды. Бала университетке түскенде сол ақшаны қолдана алады. Егер сол ақшаны жинау барысында қолайсыз жағдай кесірінен әке-шешесі өмірден озып кетіп жатса, біз ол баланы 17 жасқа дейін жеткізіп, армандаған оқу орнына түсіріп, оқу ақысын төлеп береміз.
Отбасы құндылығы мен мансап жолын барынша тең ұстауға тырысып келемін. Әр балам қырқынан шыққанша анам көмектеседі. Жолдасым қай бастамамды да қолдап, тілеулес болып отырады. Әйел үшін мансап құру, ерлер деңгейінде табыс табу қиын ғой. Себебі біздің күнделікті өмірде атқаратын рөліміз көп. Жұмыстан үйге жеткенше ана тамақты істеймін, мынаны ысытып жіберемін, мынаны жуып тастаймын деп ойланып барамыз. Сөйте жүріп, жұмысты да шет қалдырмау керек. Отбасыма ғана емес, халқыма да пайдам тиюі керек деген қағиданы ұстанамын.
Жыл сайын қаржы саласында үлкен жетістікке жететін әйелдер қатары артып келеді. 8 наурыз мерекесінде ең бірінші анамызды құттықтауға барамыз. Отбасымыздың ақылшысы, берекесі анамыз риза болса, біз үшін сол ғанибет. Одан кейін жұмыста қыз-келіншектерді, әріптестерді құттықтаймын. Әйел азаматтар құлпыра берсін.
Жанар Жұбаниязова,
«Халык-Life» АҚ өмірді сақтандыру компаниясының басқарма төрағасы
