Әйелдер күресінен өткен жарыстың алғашқы күні қоржынымызға екі жүлде түсті. 76 кг салмақтағы Елмира Сыздықова ақтық сынға алқынбай жеткенімен, шешуші тұста қырғыз Айпері Медетқызына жол берді. 57 кг салмақта белдескен Эмма Тисина қола медальды иеленді. Келесі тәулікте Ирина Кузнецова (62 кг) финалға шығып, Айсұлу Тыныбековамен күш сынасты. Бірақ Қырғызстанның атақты балуанына отандасымыздың әлі жетпеді. Ал Гүлмира Бекеш (59 кг), Елена Шалыгина (68 кг) және Шәмшібаяну Тастанбек (72 кг) үшінші орынға табан тіреді. Нәтижесінде 133 ұпайды еншілеген Қазақстан құрамасы жалпы командалық есепте үшінші сатыға жайғасты. Алдымызда – Жапония (135 ұпай) мен Моңғолия (133 ұпай).
Бұрымдылардан кейін грек-рим күресі шеберлері боз кілемге шықты. Бұл жарыста қос қоланы қанжығаға байладық. Оның иегерлері – Мейрамбек Айнағұлов (60 кг) пен Темірлан Шадукаев (77 кг). Сөз орайы келгенде, Мейрамбекті бас жүлде үшін таласу мүмкіндігінен айырған қырғыздың тағы бір белді балуаны Жоламан Шаршенбеков екенін де айта кетуге тиіспіз.
Кеше Антальяда еркін күрестен бәсекелер басталды. 97 кг салмақта күрескен Ризабек Айтмұхан тек былтырғы жылғы әлем чемпионы Ахмед Таджудиновтан ұтылып, қола медальды қанағат тұтты.
Ал Болгарияның бас шаһары – Софияда Дан Колов пен Никола Петровтың мемориалы өтуде. Аталған жарыста Қазақстанның грек-рим күресі шеберлері тамаша өнер көрсетті. Қазірдің өзінде қоржынымызда төрт жүлде бар. Тарқатып айтсақ, 72 кг салмақ дәрежесінде күш сынасқан Әділхан Сатаевтың қарқынына ешкім шыдамады. Финалда ол Олимпиада және әлем чемпионы, ирандық Мұхамедреза Гераиды «тушемен» ұтты. 55 кг салмақта Марлан Мұқашев бас жүлдені олжалады. 63 кг салмақта Диас Әскербай дара шықса, Мұхамедәлі Мамырбек қолаға қол созды. Үшінші орын үшін сайыста Мұхамедәлі әлем чемпионатының күміс жүлдегері, екі дүркін Еуропа чемпионы, болгариялық Эдмонд Назаряннан басым түсті.
