- Ресейдің «Наше дело» промоутерлік компаниясы Санкт-Петербургте жекпе-жектің бірнеше түрінен дүбірлі дода ұйымдастырды. Нева жағалауындағы жарыстың басты бәсекесінде Орынбордың қазағы Дамир Исмағұлов пен Ресейдің туы астында өнер көрсетіп жүрген армян спортшысы Эдуард Вартанян күш сынасты. Кикбокстің ережесі бойынша өткен кездесуде екеуі де аянбай айқасты. Бірақ төрешілердің бүйрегі Эдуардқа бұрды. Үшінші раундта олар Исмағұловқа нокдаун белгіледі. Дамир өз наразылығын білдірді. Бірақ қазылар оған құлақ аспады. Ақыры Вартанян басым түсті. Жеңістің қызуы басылмай тұрып Ресей файтері Дамир Исмағұловты ММА ережесі бойынша күш сынасуға шақырды. Егер реті келсе, бұл жекпе-жектің Қазақстанда өтуі де мүмкін екені айтылды.
- Футболдан Қазақстан чемпионатының екінші тур ойындары мынадай нәтижелермен аяқталды: «Жетісу» – «Астана» 0:2, «Қайсар» – «Қызылжар» 0:3, «Атырау» – «Ордабасы» 1:1, «Тобыл» – «Елімай» 4:2, «Жеңіс» – «Шахтер» 1:0, «Тұран» – «Қайрат» 0:0. Екі кездесуден кейін 100 пайыздық көрсеткішке қол жеткізген «Тобыл» мен «Астана» жарыс кестесінде көш бастап келеді. «Ордабасы» мен «Қайраттың» олардан екі ұпайы кем.
- Теннистен Қазақстан құрамасының капитаны Ярослава Шведова өз қызметінен кетіп, оның орнына Юрий Щукин тағайындалды. 44 жастағы маман 2008-2014 жылдар аралығында ұлттық командамыздың сапында өнер көрсетті. Ролан Гаррос пен Аустралияның ашық біріншілігінде ойнап, АТР рейтингінде 119 орынға дейін көтерілді. Кейінгі кездері Щукин Шведованың көмекшісі болды.
- Сауд Арабиясының астанасы – Эр-Риядта кәсіпқой бокс кеші өтті. Басты бәсекеде аса ауыр салмақта айқасатын франциялық Франсис Нганну мен ұлыбританиялық Энтони Джошуа жұдырықтасты. Алғашқысы – аралас жекпе-жектің хас шебері, UFC-дің экс-чемпионы. Екіншісі – бокстан Олимпиада чемпионы, кәсіпқой бокстан әлемнің экс-чемпионы. Бұл айқаста Джошуа Нганнуды екінші раундта нокаутқа жіберді.
- Футболдан Қазақстанның жасөспірімдер құрамасының (U-15) аға жаттықтырушысы болып 64 жастағы ағылшын маманы Стюарт Халл тағайындалды. Ол әр жылдары өз елінде, Үндістан, Сент-Винсент пен Гренадин, Занзибар, Танзания, Руанда, Кения, Бангладеш, Эфиопия және Филиппинде еңбек етті. Сонымен қатар, Халл еліміздегі балалар мен жасөспірімдер футболын дамытуға бағытталған «High Performance» бағдарламасына жетекшілік етеді.
