Галереяның екі залына орналасқан фотолар ширек ғасырдағы тынымсыз еңбек жемісі. Мұнда әсіресе тарихқа қызыққандар мен болашақ археологтер үшін дерек алар туынды көп. Өйткені Шакимардан Мәжитұлы ежелгі өркениет ізі сақталған өңірдегі тарихи орындар мен көне көмбелерді таспалаған фотосуретші.
Көрменің ашылу салтанатында облыстық мәдениет, архивтер және құжаттама басқармасы басшысының орынбасары Қуаныш Жанұзақов, жырау, Қазақстанның еңбек сіңірген қайраткері Алмас Алматов, облыстық тарихи-өлкетану музейінің директоры Сапар Көзейбаев көрме иесінің өңірдің мәдени-рухани фотошежіресін жасаудағы еңбегін атап өтті.
Көрермен назарына көрмедегі Сырдағы сақтар тарихынан сыр шертетін қалалар мен қорғандар, ортағасырлардағы кесенелер бірден ілінеді. Екі ғасырдан астам тарихы бар Қызылорда қаласының кешегісіне куәгер ескерткіштер мен ғимараттар, Сырдың сұлу табиғаты бейнеленген фотолар да осында.
Облыстық тарихи-өлкетану музейінің құрылғанына 85 жыл толуына байланысты ұйымдастырылған көрмеде автордың жеке қорындағы фотоаппарат түрлері, суреттері енген кітаптар да қойылды.
Қызылорда
