Бұл қоғам алмасып, жылдап жалақы алмаған жұрттың көбі күнкөрістің қамытын мықтап киген аласапыран уақыт еді. Жан-жақтың бәрі қусырылып келе жатқандай сезілетін сондай кезең қиындығын студенттік өмір байқатпады. Оқу орнын бастауыш сынып мұғалімі мамандығы бойынша бітіріп, еңбек жолын өзі оқыған № 111 орта мектептен бастады. Көздері жәудіреп отырған топ баланың алдына жүрексіне шыққаны кеше ғана сияқты еді. Бүгін қарап отырса, оған да 31 жыл болыпты.
Қазіргі білім саласы өзгеріске толы. Жаңа қоғам мұғалімі осы жаңалықтан қалмай, заманауи әдістемелерді меңгеруі керек. Әсіресе мектеп табалдырығын жаңа аттап, жан-жағына үркектей қарап отырған шәкірттер жүрегіне кілт тауып, олардың танымын кеңейтуге алғаш қадам жасайтын бастауыш сынып мұғалімдерінің жүгі екі есе ауыр. Осы күні педагог-зерттеуші санатындағы жоғары білімді бастауыш сынып мұғалімі Шұғыла Қанибекқызы әр салада бір биікті бағындырған оқушыларын мақтан етеді.
Ұлт ұстазы Ахмет Байтұрсынұлының «Біз елді түзеуді бала оқыту ісін түзеуден бастауымыз керек» деген тәмсілі ұстаздықтың қай уақытта да ауыр жүк арқалағанын аңғартады. Мемлекет басшысының бастамасымен салаға қолдау артып, қала мен ауыл мектебі арасындағы айырмашылықты азайту бағытындағы бастамалар қолға алынды. Бұған, әрине, біз қуанамыз. Республикалық «Ақбота», «Бастау» олимпиадаларында, халықаралық «Кенгуру», «Пони» байқауларында жеңімпаз атанған шәкірттерімнің жеңісіне марқаямын. Ауыл мектебінің мәртебесін көтеруге сәл де болса септігімді тигізгеніме қуанамын. Осындайда ең әуелі мені ұлы мұрат жолындағы ұстаздар қатарынан көргісі келген әкем мен анамның сенімін ақтағаныма шүкіршілік етемін», дейді ол.
Ізденімпаз педагог 2021 жылы аудандық «Үздік бастауыш сыныптағы математика пәнінің мұғалімі 2021» байқауында жүлделі орыннан көрінді. Келер жылы «Білім беру ұйымдарындағы әдістемелік жұмыстарды ұйымдастырудың ерекшеліктері мен мүмкіндіктері» тақырыбындағы облыстық семинарда марапат төріне көтерілді. Сол жылы «Математикалық сауаттылық – ой дамыту» тақырыбындағы авторлық бағдарламасы жарық көріп, «Тәуелсіздік тірегім – Елтаңбам елдігім» атты республикалық байқаулар жинағына мақала жариялады. Республикалық басылымдарда бастауыш сыныптарда мақал-мәтелдер арқылы оқушының тіл байлығын дамыту бағытындағы мақалалары жарық көріп жүр. Осы жетістіктері үшін әр жылдары аудандық, облыстық кәсіподақ комитеттерінің, аудандық білім бөлімінің марапатын алды.
Былтыр күзде бастауыш сынып мұғалімдеріне арналған республикалық «Алтын тұғыр» олимпиадасының аудандық кезеңінде топ жарды. Биыл қаңтарда облыстан да озық шығып, республикалық кезеңге дайындалды. Ақпан айында педагогтердің кәсіби құзыреттілігін арттыру, мұғалімнің шығармашылық әлеуетін дамыту мақсатында Астана қаласында «Дарын» РҒПО мен «Зерделі» ақыл-ой дамыту орталығы ұйымдастырған республикалық сайыста Шұғыла Қанибекқызы елдің әр түкпірінен жиналған 160-тан астам әріптесінің арасынан дара шығып, І орын иеленді. Байқауда биіктен көрінген ауыл мұғаліміне Дубайға жолдама табысталды.
«Олимпиада тапсырмалары бастауыш сынып бағдарламаларын негізге алып құрастырылған авторлық, логикалық есептерден тұрды. Еліміздің әр қиырынан жиналған мұғалімдермен бәсекеге түсіп, ең жоғары ұпай жинадым. «Алтын тұғыр» – мамандар тәжірибесін ұштап, ынталандыратын жоба. Кәсіби дағдымызды жетілдіріп, бәсекеге қабілеттілігін арттыра түсетін сайыстан түйгенім көп. Менің жеңісіме сенім білдіріп, қолдау танытқан әріптестеріме, аудандық білім бөліміне, өзім еңбек ететін № 111 орта мектеп ұжымына алғысымды білдіремін», дейді Шұғыла Қанибекқызы.
Қызылорда
