Фото: olympic.kz
Еліміздің әйелдер құрамасының бас бапкері Ерлан Алпысбаев 10 шәкіртіне сенім артып отыр. Анадолы еліне аттанатындардың арасындағы ең атақтысы – Әбиба Әбужақынова. Аса жеңіл салмақта өнер көрсетіп жүрген қазақтың алтын асықтай қызы көптеген байрақты бәсекеде атой салып, барша жанкүйерлерді қуантты. Биылдың өзінде ғана «Үлкен дулыға» санатындағы турнирлерде Әбиба бірнеше мәрте жеңіс тұғырына көтерілді. Осындай орасан табысының арқасында ол Қазақстанның дзюдошылары арасынан әлемдік рейтингте ең жоғары тұр. Қазіргі кезде Әбужақынова – төртінші орында.
Ал өзге салмақ дәрежелерінде Диана Букреева (48 кг), Толғанай Әбеуова (52 кг), Бақыт Құсақбаева (57 кг), Самалай Ерғалиева мен Гүлнұр Бақанова (63 кг), Екатерина Токарева (70 кг), Маргарита Гриценко мен Аруна Жангелдина (78 кг) және Ақерке Рамазанова мен Мәдина Парагульгова (+78 кг) бақ сынайды.
