Ұлттық тестілеу орталығының ақпаратына сүйенсек, наурыз айындағы ҰБТ басталғаннан бері тестілеуді тапсырған 60 мыңдай талапкердің 71,49%-ы қазақ тілінде, 29,39%-ы орыс тілінде, 70 адам ағылшын тілінде тестілеуден өтті. ҰБТ басталғалы шекті ұпайды 69,26%-ға жуық талапкер жинады. Орташа ұпай 65,08 балды құрады. Ал ең жоғары ұпай – 137.
Тестілеуге қатысушылардың басым бөлігі «математика-физика» 17,38% және «Биология-Химия» комбинациясын 15,91%-дан тапсырды. Сондай-ақ ең көп таңдалған комбинациялар қатарына талапкерлердің 11,75% таңдаған «математика-информатика» комбинациясы кірді. Ең аз таңдалғаны «химия-физика» комбинациясы болды, бұл бойынша тестілеуді 76 адам тапсырған.
«Бүгінгі таңда 81 ереже бұзушылық анықталған. Оның ішінде 50 талапкер смартфон, шпаргалка және басқа да тыйым салынған заттарды алып өту әрекеті кесірінен тест тапсыру мүмкіндігінен айырылды. Тестілеу кезінде ережелерді бұзғаны үшін аудиториядан 31 адам шығарылып, олардың нәтижелері жойылды. Бөгде тұлғалар анықталған жоқ. Ерекше білім беру қажеттіліктері бар оқуға түсушілер үшін қолайлы жағдай жасаудың арқасында ҰБТ-ға екі аптада 148 талапкер қатысты», деп хабарлады Ұлттық тестілеу орталығы.
Наурыз ҰБТ-сы осы айдың 30-на дейін жалғасады. Наурыздағы ҰБТ-ға шартты түрде ақылы негізде күндізгі оқу нысаны бойынша жоғары оқу орындарына қабылданған, өткен жылғы мектеп және колледж түлектері, Қазақстан азаматы емес ұлты қазақ тұлғалар, сондай-ақ мектеп бітіретін түлектер жоғары оқу орындарына ақылы негізде түсу үшін қатысады. Қатысушылар тестілеу өткізілетін орынды, күнді және уақытты өздері таңдайды. ҰБТ-дағы пәндердің саны өзгеріссіз қалды, яғни үшеуі міндетті және екеуі таңдау бойынша. Бірақ «Оқу сауаттылығы» мен «Математикалық сауаттылық» міндетті пәндерінен тапсырмалар саны 5 сұраққа қысқарды. Ал бейінді пәндердің сұрақтар саны артып, 40 тест тапсырмасынан тұрады. Атап өтсек, бейінді пәндерде берілген тізімнен сәйкестікті анықтауға арналған 5 тапсырма қосылды. Осылайша, ҰБТ тапсырмалар саны өзгеріссіз қалады, жалпы 120 сұрақты құрады. Оның ішінде «Қазақстан тарихынан» 20 тапсырма, «Оқу сауаттылығынан» 10 тапсырма, «Математикалық сауаттылықтан» 10 тапсырма және екі бейінді пән бойынша 40 тапсырма. Жоғары балл – 140, ол да өзгеріссіз қалды. Тестілеу уақыты – 4 сағат (240 минут). Ал ерекше білім беру қажеттіліктері бар балалар үшін ұсынылатын қосымша 40 минут уақыт сақталады.
Талапкерлер тестілеу аяқталғаннан кейін 30 минут ішінде апелляцияға бере алады. Сертификат апелляция туралы шешім қабылданғаннан кейін тестіленушінің жеке кабинетінде қолжетімді болады. Осы орайда 2024 жылғы ҰБТ аяқталғаннан кейін күнтізбелік жылдың 31 қазанына дейін тестілеудің бейнежазбаларына талдау жүргізілетінін, тыйым салынған заттарды пайдалану немесе ережелерді бұзу фактілері анықталған жағдайда түсушінің ҰБТ нәтижелері жойылатынын, тіпті тегін оқуға түскен адамның гранттан айырылатынын еске сала кеткен жөн.
