20 мемлекеттен келген 120-ға тарта спортшының қатысуымен өтетін дүбірлі додада Қазақстанның 10 өрені өнер көрсетеді. Олар – Айдос Кенжеғұлов, Сарвиноз Мірқадірова, Владислав Захаров, Зәуреш Ақашева, Санжар Жұбанов, Әнел Бақыт, Ескендір Харки, Ангелина Романовская, Ырысбек Артықметов, Арай Әшкеева. Есімдері аталған жерлестеріміздің дені бірқатар халықаралық додаға қатысып, үлкен тәжірибе мектебінен өтті. Сондықтан да жанкүйерлер Таяу Шығыстағы турнирден отандастарымыз олжалы оралады деп үміттеніп отыр.
Десек те біздің үстел теннисшілеріміздің қарсыластары да азулы. Өзгелерді айтпағанда, Бейруттегі бәсекеде Олимпия ойындарының командалық есептегі қола және алты дүркін әлем чемпионатының жүлдегері Ду Хойкем (Гонконг), әлем чемпионатының үш дүркін қола жүлдегері, Азия чемпионы Ан Джэ Хён (Оңтүстік Корея), Азия чемпионатының он дүркін жүлдегері Чуан Чи-Юань (Тайпей), Азия чемпионатының командалық есептегі қола жүлдегерлері Хармит Десай, Манав Таккар, Сатиян Гнанасекарян (Үндістан) сынды саңлақтар бақ сынайды.
